LUGUBULO 15 - Lagano da Isambi

Lwila lwa Mose lwa kihumo. Dihema difungulwa kuulanga

¹ Vinghalile nilola, mbona unzonza uyagwe mkulu kuulanga wa kukanganya, iwo malaika saba wene maliho saba ga kimambukizo, kilumbo ago gago gomambukiza lusango lwa Mulungu.

² Kabili nichona kinhu kamba bahali ya kiwowo ibanile na moto; niwona waja wahumile mgazo wa yuja Mnyama na kinyago chake na mpeto wa twaga jake; wemile mmambwegambwega ga ibahali ya kiwowo, wogoga vingʼwengʼwe vya Mulungu.

³ Wemba lwila lwa Mose mtumigwa wa Mulungu, na lwila lwa Mwananghondolo, walonga, “Sanghano zako nghulu na za unzonza, Magana Mulungu Mwene nhogolwa; nzila zako zigoloka, zizo za ihoko, gweye Mndewa wa wanhu wose!

⁴ Yalihi yolema kukudumba, gweye Mndewa, hebu yalihi yolema kutuniza twaga jako? Kilumbo gweye uliyeka kukwatuka, na wanhu wose wokwiza kukugwila hamagulu, kilumbo vilawilila chalinze, vuuwagwelela wanhu uhonelo kwa ihoko.”

Nyungo saba za lusango

⁵ Imala nijona ngʼanda ja Mulungu, dija dihema ja usindi dili hiko kuulanga, vidifunguligwe.

⁶ Na himo mdingʼanda ja Mulungu walawa malaika saba wagogile gaja gamanghulubu saba; wavala nguwo nzelu zimelemetaga, na hana imhambaga zawo waikotela mikwizi ya zahabu.

⁷ Baho imonga wa vija Viyumbe vine kawengha waja malaika saba nyungo saba za zahabu zimemile lusango lwa Mulungu Mwene upile wa digunge na digunge.

⁸ Imala dingʼanda ja Mulungu dimema yosi dilawile muna iyenzi ya Mulungu na ugalu wake; avo hahoneke munhu yadahile kwingila mdingʼanda ja Mulungu, kikomo gaduganywe manghulubu saba ga waja malaika saba.