LUGUBULO 14 - Lagano da Isambi

Lwila lwa sambi lwa wakombolwa uchana ha Sayuni

¹ Imalabaho nimona mwana-nghondolo yemile uchana kudigongo ja Sayuni, hamonga na Heyo wakala wanhu 144 elfu, wandikilwe Twaga jake na Twaga ja Tata wake mvihanga vyawo.

² Imala mhulika dizwi kulawa kuulanga kamba kidinhilo cha mazi bwando na kamba dizwi da nghuwa nghulu; na higo gamazwi gamhulike gakala kamba mazwi gawo watowa vingʼwengʼwe vyawo.

³ Kuno wokwimba lwila lwa sambi behi ya kija ikigoda cha Yenzi, na behi ya vija Viyumbe vine hamonga na waja Wavyele; avino haduhu munhu yadahile kwifunza lwila luja komu waja 144 elfu wakomboligwe muna iisi.

⁴ Wano wawo hawabanangwe na watwanzi, kwa mzoko iwo wanawali watelele, womkola Mwana-nghondolo hohose hoyochola, kwa mzoko wakomboligwa kulawa kwa wanhu; wagalamka mulimbu wa Mulungu na Mwana-Nghondolo.

⁵ Na mmilomo yawo hamoneke utungulu, wabule kinghwaso.

Usenga wa malaika 3: Kitala na mwazaganyo

⁶ Vinghalile nilola, nimona malaika iyagwe yoguluka hagatigati kuulanga, mwene Usenga Unogile wa Idigunge, yawapetele wose wokala muisi, walumwengu wose, ngholo zose, ulonzi wose na madale gose.

⁷ Na heyo kalonga kwa dizwi kulu, “Mdumbeni Mulungu na kumtuniza; kilumbo kikomo cha kitala chake kivika; mfugamileni Yuja yaumbile ulanga na isi, ibahali na nzokwe za mazi!”

⁸ Halawilila chusa malaika wekabili, kalonga, “Digwa digwa diwambo dikulu ja Babeli, dikalile diwangʼweza ngholo zose ugimbi wa ngholwa ya ugoni wake!”

⁹ Kalawilila malaika wekadatu kuwawinza waja, kuno yolonga na dizwi kulu, “Munhu yahamfugamila yuja Imnyama na kinyago chake, yobokela utango wake mkihanga chake hebu mumkono wake,

¹⁰ heyo kongʼwa ugimbi wa lusango lwa Mulungu, ugongomanywe haupiligwe na mazi, muna ikikonha cha lusango lwake, na heyo kolumizwa hamoto na kikwatulo, hameso ga malaika wangʼalile na hakihanga cha Mwana-Nghondolo.

¹¹ Na yosi ja mgaduko wawo wokwela uchana digunge kwa digunge, wabule mhumulo imisi na ikilo iwo waja, wamfugamile yuja Imnyama na kinyago chake, wobokela utango wa twaga jake.”

¹² Aho baho holondwa mwazaganyo wa wangʼalile waja wazigogile ndagizo za Mulungu na nhamanilo ya Yesu.

¹³ Imala mhulika dizwi dilawa kuulanga dilonga, “Yandika, Wamota lulawile sambi waja wadanganike mditwaga da Mndewa.” “Vivo” yolonga Loho, “kwiza wahumule kulawa migaduko yawo, na masanghano gawo woilongoza nago.”

Sengo ikutwa ipigiswa muisi; dikamilo jene mulopa

¹⁴ Vinghalile nilola, mhunde mbona wingu zelu, na himo mdiwingu uchana kakala imonga yagambile Mwana wa Munhu; kavala mulufiya wa zahabu mditwi jake, na mumkono wake kagoga sengo ikutwa nghani.

¹⁵ Avija malaika iyagwe kalawa mdingʼanda ja Mulungu, kalava dizwi kulu, kamulongela yuja yakalile uchan mdiwingu, “Gala sengo yako uhune! kilumbo kikomo cha kuhuna kivika, na ndigwa ya muisi ipa!”

¹⁶ Na yuja yakalile uchana mdiwingu kaipigisa sengo yake muisi, na isi ihunigwa.

¹⁷ Imala halawa malaika iyagwe muna dingʼanda ja Mulungu dili hiko kuulanga, na yuno na heyo kagoga sengo ikutwa nghani.

¹⁸ Halawa na malaika iyagwe hana upango wa nhambiko, kana lwamu lwa moto; kalava dizwi kulu, kamulongela yuja mwene sengo ikutwa, kalonga, “Gala sengo yako ikutwa, ukanhe vipambo vya mitongoni ya muisi, kilumbo mujo wake wipa!”

¹⁹ Baho malaika kaipigisa sengo yake muisi, kahuna mitongoni ya muisi, kavigela vipambo muna dikamulilo dikulu dimemile lusango lwa Mulungu.

²⁰ Na dikamilo hijo dimana kubojagwa hanze ya diwambo, ulawa mulopa muna dikamilo hijo, umema uvika muna zinzabi za nyumbu, na uchozi wake maili miya mbili.