LUGUBULO 12 - Lagano da Isambi

Mtwanzi yavazigwe zuwa, kawingwa na zoka

¹ Imala woneka unzonza mkulu kuulanga, mtwanzi yavazigwe zuwa; na mbalamwezi ikala hasi hamigulu yake, na muja mditwi jake kakala na mulufiya wene nhondo mulongo umwe na mbili.

² Kakala na inda kuno yolila, kilumbo kolumwa usungu wa kulela.

³ Imala woneka unzonza uyagwe kuulanga: Zoka dunghu kulu jene matwi saba na mhembe mlongo umwe; mmatwi gake kana milufiya saba.

⁴ Na mkila wake wokwega fungu jekadatu ja nhondo za kuulanga na kuzibwanha hasi; imala dija zoka diza, dima behi ya yuja imtwanzi yolonda kulela, giladi yahalela dimuje imwanage.

⁵ Na heyo kalela mwana wa kimbigalo, yondayawatawale ngholo zose za isi kwa mkongoja wa chuma; imalabaho mwanage kanyagamulwa, kagaligwa kwa Mulungu hana ikigoda chake cha iyenzi.

⁶ Na heyo imtwanzi kakimbilila kuluwala, ako kana hanhu hayamsagulile Mulungu, yateganywe hiko mazuwa elfu imwe mizo mibili na milongo sita (1,260).

Nghondo ya Mikaeli kudihuma zoka

⁷ Kukala na nghondo kuulanga: Mikaeli na malaika zake wagomba na dija dizoka; na dizoka digwisa nghondo hamonga na malaika zake.

⁸ Na hewo hawahumile, hebu honeke hanhu hawo kabili kuja kuulanga.

⁹ Imala dija dizoka dikulu jasigwa hasi, dijo zoka kulu da umwaka dikemagwa Mgela Kiswalu na Mwenembago Yakongaga wanhu wose; kasigwa hasi hamonga na malaika zake wose.

¹⁰ Nimana kuhulika dizwi kulu kuulanga, dilonga, “Sambi uhonelo uvika, na mhiko za undewa zizo za Mulungu wetu, na ndagizi zizo za Kristo wake, kwa mzoko kasigwa hasi yuja yagelile ndugu zetu mkitala, yuyo yakalile yowahimbila wanhu hakihanga cha Mulungu wetu imisi na ikilo.

¹¹ Na hewo wamuhuma na mhiko ya mulopa wa Mwana-Nghondolo, na kwa ulonzi wa usindi wawo, hawaunogele ugima wawo, vilema wavikile mkudanganika.

¹² Avo dengheni mweye ulanga, na mweye mkalaga mumo! bali mweye mojona, isi na bahali, kilumbo Mwenembago kahulumuka kumwenu, kana lusango bwando, kilumbo kavimanya kamba mazuwa gake madodo.”

¹³ Na dija dizoka vidiwene kamba kabwanhigwa muisi, baho kamkimbiza yuja imtwanzi yalelile yuja imwana wa kimbigalo.

¹⁴ Komu imtwanzi kagolelwa mabawa mabili ga kimhanga mkulu, giladi yaguluke yachole kuluwala, yavike hanhu hake hoyoteganywa miyaka midatu na nusu, yalawe hakihanga cha yuja dizoka.

¹⁵ Baho dija dizoka dilava mazi mmulomo wake kamba lwanda, kamtemela yuja imtwanzi, giladi yamdidimize mumuja mulwanda.

¹⁶ Bali isi imtaza yuja imtwanzi, ifungula mulomo wake na kulungʼwa luja ulwanda, lulawile mmulomo wa dija dizoka.

¹⁷ Avo dizoka dimonela lusango yuja imtwanzi, kachola kugwisa nghondo na waja wasigale muulelwa wake, iwo wawo wazigoga ndagizo za Mulungu na usindi wa Yesu.

¹⁸ Imala dizoka dima hamisenga ya ibahali.