LUGUBULO 11 - Lagano da Isambi

Yohana kadilinga dihekalu; wasingi wabili wakomigwa

¹ Imala ngwelelwa mulanzi ugambile mkongoja, nongelwa, “Gandamka udilinge ngʼanda da Mulungu na upango wa nhambiko, na waja wene kutambikila mumo.

² Komu mabegehi gali hiko kunze kuna dingʼanda da Mulungu, ugaleke sukuugalinge; kilumbo higo wagolelwa wanhu wa zingholo, na hewo wodibojaga diwambo dingʼalile miyezi milongo mine na mibili.

³ Na niye nogala wasindi zangu wabili, wafambule siku zija

¹²⁶⁰ (iyo ija miyezi 42), wovala maguniya.”

⁴ Hiwo iwo ija imichekele mibili na ija imiwenge mibili, imile behi ya Magana Mndewa wa isi.

⁵ Ihawa munhu yolonda kuwalumiza, moto ulawa mmilomo yawo na kuwaja iwandumu wawo; na munhu yolonda kuwalumiza, avo vivo vimwandama yakomigwe.

⁶ Hewo wenghigwa mhiko ya kuufunga ulanga, giladi mvula sikuyatowe mazuwa gaja ga utulandagu wawo; kabili wenghigwa mhiko ya mazi kugahindula gagalamke mulopa, na kuigela isi maliho gogose, miyanza yoyose iwolonda.

⁷ Na hewo vonda wamambukize usindi wawo, yuja Mnyama mkali yolawa kuzimu kotenda nghondo nawo, na heyo kowahuma na kuwakoma.

⁸ Na mitufi yawo yokala muna inzila ya diwambo dikulu dikemagwa kiloho Sodomu na Misri, iho baho Mndewa wawo hayawambigwe mdibiki.

⁹ Na wanhu wa ngholo na vilagwa na ulonzi na isi bwando woyona mitufi yawo siku ndatu na nusu, hawaisola mitufi yawo izikigwe mkabuli.

¹⁰ Baho waja wokala mulumwengu woimozamoza kwa kifo chawo, wotowa nghenze na kwigalila miyawi, kilumbo walaguzi waja wabili wawagaza waja walumwengu.

¹¹ Komu siku ndatu na nusu vizibitile, loho ya ugima ilawa kwa Mulungu, iwengila, na hewo wenuka, wema wima, na wose wawawene wagwa kingwaya.

¹² Imala wahulika dizwi kulu kulawa kuulanga, diwalongela, “Kweleni kuno!” Waja wakwela kuulanga mdiwingu, na iwandumu zawo kuno wowalola.

¹³ Kipigiti kikija kukala na kingudemo kikulu cha isi, na fungu ja mulongo umwe ja diwambo dimogoka digwa, na wanhu wafile na kingudemo hicho cha isi, mpeto wawo ukala elfu saba; na hewo wasigale wengilwa na kidumbo, wamtunila Mulungu wa ulanga.

¹⁴ Gumbilo jekabili dibita; lola gumbilo jekadatu jokwiza chambwisa.

Mhalati ya 7. Nhogo kuulanga

¹⁵ Malaika wa saba viyaitatalise imhalati yake, kukala na mazwi bwando makulu kuulanga galonga, “Utawala wa ulumwengu vino sambi uwo wa Mndewa Mulungu wetu na wa Kristo wake (Mgeligwa Mavuta), na heyo kotawala digunge na idigunge.”

¹⁶ Baho waja Wavyele 24 wakalile behi ya Mulungu muna ivigoda, wagwa kingubanguba, wamtambikila Mulungu,

¹⁷ walonga, “Tokulavila nhogo gweye Magana Mulungu, Mwene mhiko zose, gwegwe ulibaho, na ukalile baho; kwa kilumbo usolile utawala wako mkulu!

¹⁸ Walumwengu wagwile lusango; baho lusango lwako lulawilila, na siku yako ivika ya kuwatagusa wafile, kuwengha kitumetume chawo watulandagu watumwa wako na wangʼalile wose, waja wodidumba twaga jako, wali wadodo kwa wakulu; na kuwabananga waja wabanange iisi!”

¹⁹ Imala ngʼanda da Mulungu dili hiko kuulanga, difunguligwa, na sanduku ja Lagano joneka mumuja mngʼanda da Mulungu; kulawilila lumwemwe na mazwi, nghuwa na kingudemo cha isi na mvula ya mabwe bwando nghani.