LUGUBULO 10 - Lagano da Isambi

Milulumo 7 ya uhozi na yene kuihuguza ndagu

¹ Imalabaho nimona malaika iyagwe, ayo iyo mgaga, kahulumuka kulawa kuulanga, kavazwa nguwo ya wingu, na pinde da Mulungu dikala mditwi jake; kihanga chake kikala kamba zuwa, na migulu yake kamba mhanda za moto.

² Mumkono wake kagoga kitabu kidodo kikalile kigubuke; na mgulu wake wa ukulume kawika uchana mbahali, na wa ukumose kawika muli isi inyalile.

³ Na heyo kalava dizwi kulu kamba Mnyamasongo yotongoloma; na viyatongolome, ija milulumo saba ilawa mazwi gawo.

⁴ Na hiyo milulumo saba viimalile kulonga, nilonda kuwandika ulonzi wawo; mhunde mhulika dizwi dilawa kuulanga, dilonga, “Gela utango ulonzi hiwo wa milulumo saba, komu sukuwandike.”

⁵ Na yuja malaika imbonile, yemile mgulu umwe mbahali na uyagwe muisi, kenula mkono wake wa ukulume kuulanga;

⁶ kaiduwila kwa Mwene Upile wa idigunge, Heyo yaumbile ulanga na vyose vilimumo, na bahali na vyose vilimumo, na isi na vyose vilimumo, kalonga, “Hondayakawe kabili;

⁷ komu siku ya dizwi ja malaika wa saba, vondayatatalise mhalati yake, baho vonda zivikizwe mbuli za kifiso za Mulungu, kamba viyawapetele Usenga Unogile waja watumwa wake Walaguzi.”

Yohana kakimeza kitabu chene ndagu kigubuke

⁸ Baho dija idizwi dimhulike kulawa kuulanga, dilonga kabili na niye, “Genda ukisole kija ikitabu kidodo kigubuke, muli umkono wa malaika yuja yemile mgulu umwe mwibahali, na mgulu uyagwe muisi inyalile!”

⁹ Nyhola kwa yuja malaika, nimulongela yaninghe kija ikitabu kidodo; na heyo kanongela, “Kisole hicho ukimeze; kwiza chokugela usungu munda mmwako, bali mmulomo wako chokuwa mulile kamba uki.”

¹⁰ Nikisola kija ikitabu kidodo mumkono wa yuja malaika, nikimeza; na hicho kikala mulile kamba uki mmulomo wangu, komu vinimalile kukimaza, ngeligwa usungu munda mmwangu.

¹¹ Avija nongelwa, “Gweye ikwandama kupeta utulandagu kabili kwa wanhu na ngholo na ulonzi na watawala bwando.”