LUGUBULO 1 - Lagano da Isambi

Kulamusa na nhogo zake Yesu Kristo

¹ Luno lulo Lugubulo lwa Yesu Kristo luyenghigwe na Mulungu, yawalagile watumwa wake magweka gondagalawilile chambwisa; kamtuma malaika wake yamdogolele mtumwa wake Yohana magweka gano.

² Heyo yuyo yadisindile Longa da Mulungu na usindi wa Yesu Kristo, gaja gose gayawene.

³ Kamota yuja yondayawasomele wanhu, na waja wondawahulike mbuli za lugubulo luno, kuno wogagoga gaja gandikigwe muno, kilumbo mazuwa gammabehi.

⁴ Niye Yohana nowalamusani mweye madale saba msaguligwe muli hiko Asia; uholo umkalileni na tindiwalo dilawaga kumwake Heyo yalibaho, yakalile baha, na yondayeze, na kwa waja Loho Saba wali hiko kuulongozi wa kigoda cha undewa,

⁵ na kumwake Yesu Kristo yali Msindi mtamanilwa, na kilanja wa kulawa kwa wafile, Mkulu wa watawala wa muisi; heyo katunogela, katugombola mmatozo getu kwa mulopa wake.

⁶ Avo katugongomanya tugalamka undewa wa Watambika kwa Mulungu, Tata wake, viyemela iyenzi na mhiko zizo zake digunge na digunge. Amina –

⁷ loleni kokwiza mmabingu, na meso gose gomona, na hewo wamuhomile; baho ngholo zose za muisi womulilila, Wona iyo ihoko.

⁸ “Niye iyo A na O” (kihindukizo chake, Waichanduso na Waikimambukizo), vivo viyolonga Magana Mulungu yalibaho, yakalile baho na yondayeze, Mwene iyenzi yose.

Yesu kamlawilila Yohana hiko Patmo

⁹ Niye Yohana ndugu yenu na miyenu muna imigazo na muna undewa na muna ukufunya umoyo kwa kilumbo cha Yesu, nghala mkibandasi kikemagwa Patmo, kwa mzoko nibwililisa Longa da Mulungu na kumsindila Yesu.

¹⁰ Nidukila soligwe na Loho siku ya Mndewa, mhulika dizwi kulu hachugu changu kamba dizwi da mhalati,

¹¹ dilonga, “Gano goukona gandike muna ikitabu, uwagalile gaja madale saba gali hiko Efeso, Smirna, Pergamo, Tiatira, Sarde, Filadelfia na Laodikia!”

¹² Mhinduka ndole, kamba dija idizwi ja nani dilongile na niye; na vinihinduke, mbona viwenge saba vya zahabu.

¹³ Na hagatigati ya viwenge hivo nimona imonga yagambile kamba munhu; kakala yavalile guwo tali divikile hamagulu, na iho hamhambaga kakala yefungile mkwizi wa zahabu.

¹⁴ Ditwi jake na mvili zake zikala nzelu kamba pamba hebu kamba nyhwakala, na meso gake kamba moto ukwaka;

¹⁵ magulu gake kamba shaba ndunghu isunhigwe nghani, imetuka hakivu cha moto; na dizwi jake kamba mungulumo wa mazi bwando.

¹⁶ Na himo mumkono wake wa ukulume, kagoga nhondo saba, na mmulomo mwake mlawa sime ikutwa kuno na kuno, na kihanga chake kikala kamba zuwa dingʼala na mhiko zake.

¹⁷ Na niye vinimonile, nigwa hamagulu gake kamba munhu nifile; baho kangeleka mkono wake wa ukulume, kalonga, Sukuudumbe! Niye nene waichanduso na waikimambukizo na Mwene ugima.

¹⁸ Nghala nifile; Iola vino nampile digunge na digunge, ninazo fungulo za kifo na za kuzimu.

¹⁹ Andika magweka gose gauwene, gano galibaho na gaja gondagalawilile hamwande!

²⁰ Wandike na mzungu wa zija nhondo saba ziuwene mumkono wangu wa ukulume, nawo mzungu wa vija viwenge saba vya zahabu; zija nhondo saba iwo malaika wa madale saba, na viwenge saba igo madale saba ga wasagulwe.