Filemoni 1 - Lagano da Isambi

Ngʼanda yene unogelo ya Filemoni na Apiya

¹ Niye Paulo nifungigwe kwa kilumbo cha Kristo Yesu, hamonga na ndugu yetu Timoteo, towalamusani mweye Filemoni mbwiga wetu, msanghani miyetu,

² na gweye Apiya uli lumbu jetu, na gweye Arkipo ugambile miyetu muli nghondo, hamonga na dale da wanahina dili mngʼanda yako:

³ Uholo uwakalile na tindiwalo dilawa kwa Mulungu Tata wetu na kwa Mndewa wetu Yesu Kristo!

⁴ Nomulavila Mulungu wangu nhogo mazuwa gose nihawalanga kwa nhambiko zangu.

⁵ Kilumbo nihulika vumnogela Mndewa Yesu kwa kumtamanila na kuwanogela wanahina wose.

⁶ Nokutambikila inhamanilo ija itwigondanye igangamale, na tweye tutange ganogile gose gatuli nago, gogamba tumbwezele Kristo.

⁷ Unogelo wako uningha ndengha nghulu, gweye mwanakwetu, na miyoyo idodowala kwa vija vuuzinghile mhumulo loho za wanahina.

Mbokeleni nyakadala Onesimo yagalamke ndugu

⁸ Avo vituli ndugu kumwake Kristo, nihagangamale mmoyo kukulagiza mbuli ikwandame kuisanghana.

⁹ Bali kwa kilumbo cha unogelo wako nokuhembela vino; lola niye Paulo vinili mvyele, na sambi na mfungigwa wa Kristo Yesu.

¹⁰ Nokuhembela kwa kilumbo cha mwanangu indelile muno mkifungo changu, yuyo Onesimo.

¹¹ Ayo umwaka kakala bule lutondo, komu sambi kokutaza nghani gweye na niye.

¹² Nihambweza kumwako, kamba noutuma moyo wangu mwenyecho uvike.

¹³ Na niye nivigesa kumnanahiza yakale kumwangu, yakutendele kazi ino ya kunitumikila muno mkifungo, mngeligwe kwa sosombi ja Usenga Unogile.

¹⁴ Komu silondile kutenda mbuli kilumbo hunanidika; giladi moyo wako sukuugambe wa kudoholezwa, komu mwenyecho unogelwe.

¹⁵ Kwa mzoko nogesa kwali icho kilumbo kaihasanya nagwe kwa kipigiti kidodo, giladi ukale nayo kabili digunge.

¹⁶ Lulawile sambi, hondayagesigwe kamba nyakadala kabili, bali hanhu ha utumwa kokuwa ndugu mnogelwa; kumwangu niye nghani, avo kumwako gweye kubanza dikongola, mulukuli na kwa Mndewa.

¹⁷ Avo kamba uhagelegeza niye namiyago, mbokele ayo kamba iyo niye!

¹⁸ Komu kamba kuna kinhu chako chayabanange, hebu kamba kowilwa na denyi kumwako, ago uniwile niye!

¹⁹ Niye Paulo nivyandika vino kwa mkono wangu mwenyecho, niye nogaliha; silonga kamba kwa mdenyi wangu niye, kilumbo moyo wako dijo denyi jako.

²⁰ Avo vivo mwanakwetu, tenda lunogenoge luno kwa kilumbo cha Mndewa; unihoze umoyo kwa kitando cha Kristo!

Ndamusilo

²¹ Nikwandikila kilumbo niitanga nhamanilo yako na udekedeke wako, kabili nivimanya kamba kwiza kosanghana kubanza gaja ganikulongele.

²² Hamonga na higo, unikile goya hanhu ha kukala, kwa mzoko nogelegeza kamba kwa nhambiko zenu mwammabehi kunyona!

²³ Womulamusani kina Epafuro yafungigwe hamonga na niye kwa sosombi ja Kristo Yesu.

²⁴ Marko na Aristarko na Dema na Luka iwo wasanghani wayangu, na hewo womulamusani.

²⁵ Uholo wa Mndewa Yesu Kristo uwakalile muli ziloho zenu.