2 Wakorinto 9 - Lagano da Isambi

Kuhanda kuhawa na gahigahi kohunwa hadodo

¹ Kwa mzoko wa msango wa kutaza wanahina wa Uyuda, viyemela nabule susu da kuwandikila mweye.

² Kilumbo nivimanya kamba vimnogelani, na niye kwa Wamakedonia nokidundula kwa kilumbo chenu niwalongela, Waja wa Ugriki (Akeya) weisasala wasongela mwaka ubitile; na hiko kulopola kwenu kuswagiza wayagwe bwando.

³ Avo niwatuma hiwo ndugu giladi vitwidundule kumwenu sukuvihunguke, bali mtangike mziga kwisasala, kamba vinongile.

⁴ Kwa mzoko Wamakedonia waheza hamonga na niye, wahamonani hamwisasale goya, togeligwa kinyala tweye hebu mweye wenyego, kwa kilumbo cha gaja matopa getu.

⁵ Avo niiyoha kuwazuma hiwo ndugu, walongole kuvika kumwenu, wasonge kusanga vigolelo vya nhogo zenu, vumtulongele umwaka; tuvivike vimalile kusangwa, viwe mmotelo senhambo, si vya kulava na gahigahi.

⁶ Gelegezeni gano, Mwene kuhanda na gahigahi, kwiza kohuna na gahigahi; na heyo yahandile na mmotelo, kwiza kohuna na mmotelo.

⁷ Avo munhu yalave kamba viyanduse kugesa mmoyo, sekeyalave yahawa na fundogolo, hebu kamba munhu yonanahizwa; kilumbo Mulungu komnogela mwene kulava na kwimozamoza.

⁸ Na heyo Mulungu kovidaha kuwamemezela miyawi bwando iwenele, ibwagale mazuwa gose kwa mbuli zinogile zose.

⁹ Kamba viyandikigwe, Kakutula kawagwelela waja walibule; uno unozi wake wokala digunge na idigunge.

¹⁰ Komu Heyo yomulavila muhanda mbeyu, kalavaga na mgate wa kuja; na Heyo kozongezela hizo mbeyu zenu ziwe bwando; imala kouzukiza mlelo wa ugozi wenu.

¹¹ Avo mokuwa wene gamali muna gamagweka gose, mgangamale miyoyo iwe imwe, giladi wanhu bwando wamlavile Mulungu nhogo za vigolelo vyenu, visangigwe kumwetu.

¹² Msanghanilo wa nhosa zino si kamba osegeza mahunguzo ga wanahina gayeka, bali ovikilizwa aho, bwando wahamulavila Mulungu nhogo.

¹³ Kabili vonda walagilwe utango uno wa kwitaza, womtuniza Mulungu kwa vija vumtegeleze Usenga Unogile wa Kristo umvumile; kabili mwigondanya na ndugu wano na wose wayagwe kwa uja ugozi wenu.

¹⁴ Na kwa kilumbo hicho wowatambikila mweye na kuwasulukila wamoneni, kwa mzoko Mulungu kamwinghani uholo wake kubanza wayagwe.

¹⁵ Natumuhongeze Mulungu kwa golelo jake kulu, hadidahika jose kusimulilwa!