2 Wakorinto 8 - Lagano da Isambi

Laveni hima msango wa kuwataza wakiwa; Muwalange ugozi wake Yesu yelavile mwenyecho

¹ Mowandugu, towapetela ugozi wa Mulungu uja, wanahina wa Makedonia uwagwelelwe.

² Kwa mzoko haja hawagezigwe na migaduko bwando, wahuma, wasamhuka nghani; viyemela hewo wene ukubabu ulibule na kulingwa, waiyoha kulava mali bwando kwa moyo umwe.

³ Avo nowasindila kamba wenyego wanogelwa kusanga vuwadahile, na kubanza vija vuwadahile.

⁴ Watupembela nghani na kutupula, sukutuwagomese kudilava fungu jawo da kuwataza wanahina wa Uyuda.

⁵ Komu hawalavile vija vitukala tuwalanga, bali ichanduso welava wenyego kumsanghanila Mndewa; na kumwetu vivo welaviliza kamba Mulungu viyalondile.

⁶ Avo tumswagiza Tito yaivikize na kumwenu sanghano hiyo ya kulava msango, kamba viyasongile.

⁷ Na mweye vumbanzile wayagwe muna gamagweka gose, kwa kumtamanila Mulungu hebu kudibwililisa dilonga, hebu kulava fiyuko hebu kwiswagiza kutenda ganogile gose na kwinogela na tweye, avo muwabite na muna ukulava.

⁸ Silonga nimlavileni lwamu, komu kwa vija wayenu vuwaiswagize nolonda, unogi wenu nawo utangike kamba uwo wa ihoko.

⁹ Kwa mzoko muutanga ugozi utugwelelwe na Mndewa wetu Yesu Kristo, yuno kakala mwene mali bwando, kagalamka mkiwa kwa kilumbo chetu, giladi kwa ukiwa wake heyo mweye mgalamke wene mali bwando.

¹⁰ Avo nolonga, ganigesa, gago ganogile kumwenu mduganye gaja gamsongile mwaka ubitile; aho mweye vumkalile wa ikilongozi wa kuvumila, na kusanghana vivija.

¹¹ Avino sambi mgamambukize, giladi kamba vumvumile ichanduso, avo vivo msango uduganywe kwa vija vumuli navyo.

¹² Kabili munhu yahanogelwa, Mulungu konogezwa na vigolelo viyali navyo; habetaga vija viyaswelile.

¹³ Kwa mzoko hatusanga, wayagwe giladi waituze na mweye mgaduke, bali gose galingane.

¹⁴ Kamba mweye vumuli navyo bwando siku zino, watazeni wayenu waja wahungukilwe; na hewo wahawa navyo bwando, womtazani vivo, mweye vonda muhungukilwe; avo gose golingana.

¹⁵ Kamba viyandikigwe, Aija yadondole bwando, henele, na yuja yadondole ndodo, hahungukilwe.

Mwanza wake Tito hamwe na wemilizi wabili

¹⁶ Natumuhongeze Mulungu, yamwinghile Tito moyo wa kwiswagiza kwa giladi jenu!

¹⁷ Kilumbo vitumpembele, kedikila, kabili kabasiliza kwiyoha, keza kumwenu kwa kulonda mwenyecho.

¹⁸ Imala hamonga na heyo tumtuma ndugu iyagwe yotogoligwa na wanahina wose kwa vija viyoubwililisa Usenga Unogile.

¹⁹ Ibanzile higo, kasaguligwa na madale, yatutaze sanghana ino ya msango, utugaiye tweye kwa kumtuniza Mndewa, na tutangike kamba wene kumnogeza.

²⁰ Komu toteganya munhu sekeyatunungʼunikile, kwa mzoko wa msango vonda ubitizwe na tweye.

²¹ Avo tokiyoha, mbuli ino igendele goya hakihanga cha Mndewa na hakihanga cha wanhu.

²² Kabili hamonga na wano, tomtuma ndugu yetu itumgezile miyanza bwando muna gamagweka bwando, kaiswagiza; avino sambi viyomtamanilani mweye, kobanza kwiganga.

²³ Viyema Tito mumtanga yuyo miyangu mwene kunhaza mbuli zenu; na waja wayage welongoze nayo, iwo watumigwe na madale ga wanahina, wamtunize Mndewa.

²⁴ Avo walagileni unogelo wenu, giladi wanahina wose wavitange, kilumbo twidundula, twitopela mweye.