2 Wakorinto 7 - Lagano da Isambi

¹ Mweye mbwiga zangu, vilaga kamba hivo tugwelelwa tweye, avo tuisunhe na kusegeza mabanza gose ga mulukuli na ga mwiloho; hivo touvikiza ungʼavu kwa kumdumba Mulungu.

Msusuwalo wa kimulungu, kimoso cha msusuwalo wa imbago

² Tugoleleni ulegeho mmiyoyo mmwenu; haduhu munhu itumtendele gehile, haduhu itumuhonzile, haduhu itumkongile.

³ Sigalonga kamba niwadununze; kilumbo nonga haichanduso kamba mwa mumo mmiyoyo mmwetu, avo tufe hamonga, imala tuwe wapile hamonga.

⁴ Nolonga namwe bunubunu, na kwitopela kumwenu bwando, avo moyo wangu utongomala wose, usamhuka nghani muna imigazo bwando.

⁵ Kilumbo vituvikile Makedonia, nghuli zetu hazihumule kwa migaduko itupatile hosehose; kunze kukala mdokodoko, na mgati kuzevezigwa.

⁶ Komu Mulungu yowahoza iwadekedeke miyoyo, katuhoza na tweye, Tito viyezile.

⁷ Si kamba kwiza kwake kuyeka kutuhozile, bali na uhozi uja viyahozigwe mwenyecho haja hayamonileni vumuli, na heyo katudogolela, vumsulukila kutona, vumwiyalala na vumwiswagiza kwa kilumbo changu niye; avo nividenghelela kubanza gayagwe.

⁸ Kwa mzoko kamba nihawasusuwaza kwa lupwilili lwangu, avo sambi siyalala; viyemela nihaiyalala haja hambonile kamba lupwilili lumsusuwazani mhunde yeka,

⁹ Avino sambi nokimozamoza, si kwa kilumbo msusuwazwa, komu kwa kilumbo cha umsusuwazo umpatile, umlangukizani kwiyalala, kilumbo msusuwazwa na Mulungu, avo ha-mtendelwe gehile kulawa kumwetu.

¹⁰ Kwa mzoko msusuwalo wa Kimulungu omgala munhu hana ukuhona, omwingha mgaluko ulibule uyalazi kabili; komu msusuwalo wa imbago ino omgala munhu mkifo.

¹¹ Loleni uja msusuwazo wa Kimulungu uwaswagiza vilihi kwibela, kileka mwihilwe, mugwa kidumbo, msulukila na kwiyoha kuilihila ija imbuli chambwisa; na vumgasanghane gose, mwilaviliza wenyego kamba mwamduhu muna imbuli ija.

¹² Na niye viniwandikile gaja, si kamba kwa kilumbo chake yuja yabanange hebu yatozelwe, bali nyandika giladi koneke vumkiswagiza kwa kilumbo chetu hameso ga Mulungu;

¹³ avo tugangamazwa miyoyo. Ahaja vitugangamale, ndengha yetu ifunhilila, ibwagala kwa kilumbo cha ndengha ya Tito, viyahozigwe mloho yake kumwenu, hohose.

¹⁴ Niye nghala nikitopela hamwake kilumbo chenu; avo sigwile kinyala, na kamba vituwalongele gose ga ihoko, avo vivo gaja matopo getu hamwake Tito gakala ga ihoko.

¹⁵ Baho na moyo wake ugendelela kuwagelegeza mweye mose, vumumtegeleze na kumbokela kwa kidumbo na nhogolwa nghulu.

¹⁶ Nokimozamoza kamba nodaha kuwatamanila mweye muna gamagweka gose.