2 Wakorinto 6 - Lagano da Isambi

¹ Kwa vija vitusanghana hamonga na Mulungu, towazuma sukumgwelelwe yamba uholo wa Mulungu!

² Kwa mzoko kalonga, Nghala nikwidike siku zinogelwe; nikutaza kwa siku za nghombolwa. Lola siku za ihoko zinogelwe izo zino za dilelo; lola lelo iyo siku ija ya nghombolwa!

³ Hatulonda tumtozele munhu wowose kwa mbuli yoyose, giladi utumigwa wetu sikuubezwe.

⁴ Bali hohose tokilaviliza kamba twa wasanghani wa Mulungu, avo tokwazaganya bwando; migaduko, minyululuko, migazo;

⁵ kutowigwa, kufungigwa, kufutuligwa, muyakayaka, kukala mangweda, kwimigwa chakuja;

⁶ kuno tongʼala miyoyo, tokalagala, tofunya umoyo, tunawo unhu wene Loho Yangʼalile na unogelo ulibule udesi;

⁷ kwa ulonzi wa ihoko, kwa mhiko za Mulungu, kwa mhinde zituhumiza mwihoko za ukulume na ukumoso;

⁸ totunilwa hebu tozeligwa, tovwizilwa hebu tohingilwa, toneka kamba twagiza wanhu, bali tolonga ihoko.

⁹ Hebu toneka kamba hatutangika, kumbe tutangika, kamba tudanganika, kumbe twa wagima, kamba wene kuhondigwa, kumbe hatukomigwe.

¹⁰ Twa wene manyululuko, kumbe tokimozamoza hohose, hebu tususuwala, kumbe towagolela wanhu bwando mali bwando, hebu twabule kinhu, kumbe vyose twenela!

Sikumwitaze hamwenga nawo wolemaga nhamanilo

¹¹ Mweye Wakorinto, tuwalongela chalinze, kabili miyoyo yetu iwafungukila nghani.

¹² Muno munda mmwetu mwilegeha, bali miyoyo yenu yokibabana.

¹³ Nolonga namwe kamba mwa wanangu; tuliheni vivo, babazuleni miyoyo yenu, tuwone ulegeho!

¹⁴ Sukumwitaze hamonga na wayagwe waja wolema kumtamanila Mulungu; che, unovu na wiho wokitegeleza vilihi? Hebu mulangaza na ziza okihanganya vilihi?

¹⁵ Hebu Kristo na Mwenembago wokitegeleza kwahi? Hebu heyo yomtamanila Mulungu, na yuja yalemile nhamanilo, wokuwaze hamonga?

¹⁶ Hebu ngʼanda da Mulungu dolingana vilihi na mizimu? Kilumbo tweye twa ngʼanda da Mulungu Yali na upile, kamba viyalongile, Nokala hagatigati yawo, kabili notembela kumwawo, nigalamke Mulungu wawo, na hewo wogalamka lukolo lwangu.

¹⁷ Vivo kabili, Laweni hagatigati yawo, mwinege sukumkwase vinhu vya ubweto, na niye kwiza nimbokeleni!

¹⁸ Baho vondaniwe Tata wenu, amweye mokuwa wanangu wa kimbigalo na wa kitwanzi, vivo viyolonga Magana yotawala hohose.