2 Wakorinto 5 - Lagano da Isambi

¹ Kabili tuvimanya kamba vingʼanda vyetu vitukala vino hano hasi, vonda vituligwe, tokuwa na ngʼanda zizengigwe na Mulungu; zizo ngʼanda hazizengigwe na makono ga wanhu, bali zokala idigunge kuulanga.

² Kilumbo hicho totowa nyangi, kuno tusulukila kuvazwa ukazi wetu ulawa kuulanga.

³ Kwa mzoko tuhavazigwa, honda toneke kamba twa ukulunge.

⁴ Kilumbo tweye tuli mumo mkibanda, totowa nyangi kwa kupotwa, kwa mzoko tolema kuvuligwa, tolonda kuvazigwa, giladi luja lukuli ludanganikaga lumezwe na luja lwene upile.

⁵ Na heyo yogongomanya gano yuyo Mulungu, yatwinghile Iloho iwe kamba babulamana yetu.

⁶ Avo togangamala hohose, kilumbo tuvitanga kamba, tuhawa muisi yetu na nghuli zetu zino, tomkalila Mndewa kutali.

⁷ Kilumbo uchozi wetu iyo nhamanilo, si kamba kulola.

⁸ Avo vitugangamale, tolonda nghani tuhame tuhalawe mzinghuli, tuvike ukaye kumwetu kwa Mndewa.

⁹ Kwa kilumbo hicho tokiswagiza tumnogeze Heyo, ihawa tuhali baha hamwetu mzinghuli, hebu tuhaziga kuhalawa.

¹⁰ Kilumbo tweye chose itulumba tulawilile hakigoda cha ikitala cha Kristo, kila imonga yalihigwe gaja gayatendile mulukuli, gahawa ganogile hebu gehile.

Unogi wake Kristo otuswagiza; Gose gabwela ga isambi kwa umgondanyo wa Yesu; Sikumgwelelwe yainba uholo wa Mulungu

¹¹ Kwa kuvitanga kamba Mndewa kodumbiza, towazuma wanhu; komu Mulungu yuyo yotutanga vituli, na niye nogesa kamba na miyoyo yenu itutanga vituli.

¹² Hatwisindila kabili kumwenu, bali tolonda kuwengha ulegeho wa kwitopa kwa kilumbo chetu, giladi muwahume waja wokitopela magweka ga kunze, galekile kukala mmoyo.

¹³ Kilumbo kamba wahalonga tuna luwege, avo tuna luwege kilumbo cha Mulungu; kabili tuhakalagala, tokalagala kwa kilumbo chenu.

¹⁴ Kwa mzoko unogi wa Kristo wotuswagiza tuwalange vivo, kamba Imonga yahadanganika kwa kilumbo cha wose, aho wose wadanganika.

¹⁵ Na Yesu viyawadanganikile wose, kileka waja wene ugima sukuwaikalile wenyego kabili, bali wamkalile Heyo yawadanganikile, imala kazuswa.

¹⁶ Avo lulawile lelo, haduhu munhu yondatumtange kilukuli; ihawa tumtambula Kristo kilukuli, sambi hatumtambula kabili hivo.

¹⁷ Avo munhu yahakala mmwake Kristo, kagalamka munhu wa isambi; ga umwaka igake gabita; uhamulola, gose gabwela ga isambi.

¹⁸ Ago gose galawa kwa Mulungu; iyo yatugondanye tweye na Heyo haja Kristo hayailavile, katwingha tusanghanile uja mgondanyo.

¹⁹ Kilumbo Mulungu kakala mwa Kristo, kawagondanya walumwengu hamonga na Heyo, hawapetele ubananzi wawo; ilawabaho keka kumwetu longa da kubwililisa uja umgondanyo.

²⁰ Avo tweye twawasenga giladi ja Kristo, vivo kamba Mulungu mwenyecho viyowazuma wanhu kwa milomo yetu; avo towapembela giladi ja Kristo, Ubokeleni uja umgondanyo wa Mulungu!

²¹ Kwa mzoko Mulungu kamgalusa Kristo viyemela hatozile kinhu, yoneke mwene gehile getu kwa kilumbo chetu, giladi tweye tugaluswe na Heyo, tubokele mgoloko kwa Mulungu.