2 Wakorinto 4 - Lagano da Isambi

Hatudonha kilumbo hatwibwililisa wenyego

¹ Kwa kilumbo tugwelelwa utumigwa hiwo, kabili vitonelwe bazi, hatudonha ngʼo.

² Bali tugalema magweka ga kifiso gene kinyala, hatutenda ukalagavu wihile wa kukonga wanhu hebu kuigalula mbuli ya Mulungu; komu viili mbuli ya ihoko, tokilavanya wenyego kimwagaiya mmiyoyo ya wanhu wose, wavimanye kamba twabaha hameso ga Mulungu.

³ Usenga wetu Unogile uhawa ufisigwe, ufisigwa kumwao wene kwangamila.

⁴ Kumwawo mulungu uja wa imbago ino kawatula meso ga ngelegeza za waja walemile kumtamanila Mulungu, sukuwangazwe na mulangaza wa Usenga Unogile wa iyenzi ya Kristo, yagambile kihanga cha Mulungu.

⁵ Kilumbo hatwibwililisa wenyego, bali tombwililisa Kristo Yesu Mndewa, na tweye twawatumwa wenu kwa sosombi ja Yesu.

⁶ Kilumbo Mulungu kalonga, Muna diziza mulangaza womulika! yuyo yaingʼazile miyoyo yetu, na mgati mmwetu ulawe mulangaza wene kubwililisa kwa wayagwe iyenzi ya Mulungu, ilibaho hakihanga cha Kristo.

Tuna viya va ulongo, maza tobwezelwa upile mazuwa gose; Ngʼanda zetu zili kuulanga za idigunge

⁷ Komu dino dibikilo dituli najo damuna iviya vya ulongo, giladi zija mhiko bwando zenele, zitangike kamba zilawa kwa Mulungu, hazilawile kumwetu.

⁸ Hohose togazwa bali hatupotigwe; tozulunzwa bali hatugayagaya;

⁹ toswatizwa bali hatulekwa twiyeka; tobwanhwa hasi bali hatwangamila.

¹⁰ Hohose hotubiduka, kukomwa kwa Yesu kokoneka mzinghuli zetu, giladi na upile wake woneke mzinghuli zetu.

¹¹ Tolavigwa mazuwa gose tudanganike kwa sosombi ja Yesu; vivo upile wake Yesu wolawilila mzinghuli zetu zidanganikaga.

¹² Avo kifo kiza na mhiko kumwetu, bali kumwenu wiza upile.

¹³ Kwa mzoko vitwinghigwe Loho yuyuja mwene nhamanilo, avo kumwetu jandiko dija divikizwa, Nimtamanile Mulungu, kileka nongile; na tumtamanila Mulungu, kileka tulonga.

¹⁴ Kilumbo tuvitanga, Heyo yamzusile Mndewa Yesu, kotuzusa na tweye hamonga na Yesu, imala kotwika hakihanga chake hamonga na mweye.

¹⁵ Ago gose gotendigwa kwa kilumbo chenu, giladi bwando wahagwelelwa mhome ya uholo wake, wogangamala kumlavila Mulungu nhogo na kumtuniza.

¹⁶ Avo hatudonha; kwa mzoko zihawa nghuli zetu zolala, miyoyo yetu yobwezelwa upile chusa mazuwa gose.

¹⁷ Kilumbo mgazo wetu utuli nawo vino sambi mdodo okanhiza mbwisa; wobanza kutupatila iyenzi ilibule ningo, haizigaga.

¹⁸ Kwa mzoko hatugalola gaja gokoneka, bali tolola gaja hagonekaga; kilumbo gaja gonekaga gakalaga siku ndodo, bali gaja hagonekaga gago ga milongo na milongo.