2 Wakorinto 2 - Lagano da Isambi

¹ Avo nghala ngelegeza vino, sekenize kabili kumwenu, kuno nisusuwala.

² Kilumbo nihawagela fundogolo mweye, yalihi yondayanisamhuse, komu yuja mwene fundogolo hamonga na niye?

³ Kwa kilumbo hicho leka nilwandika lupwilili luja, giladi niheza sikuniwe na fundogolo kumwenu mweye, imgambani kunisamhusa niye; kwa mzoko mnihuguza mose kamba ndengha yangu iyo ndengha yenu mose.

⁴ Kilumbo vinimwandikileni, nghala ngaduke nghani; moyo undema, ndava mahozi bwando, si kamba mweye msusuwale, bali muutambule unogelwa wangu, vinimnogeleni mweye kubanza wayagwe.

⁵ Komu kamba kakuko yamgelileni mweye kinghwaso, hanisusuwaze niye niiyeka, bali mweye mose hebu wayagwe wenu; nolonga gano sibanza iningo.

⁶ Avo imkolela yuja yakalile na tozo, yazumigwe na wayage bwando.

⁷ Imalabaho iwandakana mweye mumlekesele na kumgangamaza, sekeyadidimizwe muna umsusuwalo, uhamulemela.

⁸ Avo nowapembela mweye, mumlagusile kamba momnogela!

⁹ Giladi hijo nghala niwandikila, nizitambule ngelegeza zenu, kumbe mwihoko monhegeleza niye muna gamagweka gose.

¹⁰ Vilema munhu yonda mumlekesele, na niye nomlekesela; vivo nihamlekesela munhu mbuli, nomlekesela kwa giladi jenu hameso ga Kristo;

¹¹ giladi sukutukongwe na Mwenembago; kilumbo fiyuko zake kumwetu tuzitanga goya.

Nungho zinogile za usenga wa Kristo

¹² Aho vimvikile Troa kuubwililisa Usenga Unogile wa Kristo, nivugulilwa mulango na Mndewa.

¹³ Komu nigaya mmoyo kwa kilumbo ndugu yangu Tito simvikile; avo niwapoza wanahina, nihalawa kuchola Makedonia.

¹⁴ Bali Mulungu nayatunizwe yotwingha kihumo mazuwa gose, tuhawa mmwake Kristo; kabili Heyo yuyo yolaviliza kimwagaiya nungho zinogile zene kumtambula Heyo hosehose hotumsanghanila.

¹⁵ Vilema behi ya Mulungu twamnungho unogile wa Kristo kumwawo wene ukuhona na wene kwangamila.

¹⁶ Kwa wayagwe uwo mnungho kulawa mkifo kwingila mkifo; na kwa wayagwe uwo mnungho kulawa ugima kwingila muupile; komu yalihi yondayagadahe higo?

¹⁷ Kilumbo hatwigamba na waja bwando wodisosokanya Longa da Mulungu kamba dibuha; komu tolonga kwa kungʼala miyoyo, kamba wanhu tuli hamonga na Kristo hakihanga cha Mulungu.