2 Wakorinto 11 - Lagano da Isambi

Wivu wa Paulo kumgalila Kristo mhambe yene kizinda; Paulo kowananga watumigwa wa utungulu

¹ Vihanogile mnyazaganye vino sambi nihatenda wehu; nivimanya kamba monyazaganya.

² Kilumbo wivu dinikona kumwenu dijo ja Kimulungu, kwa mzoko nimzengezani mweye na mbigalo imonga, iyo Kristo, nimgalile mhambe inogile yene kizinda.

³ Bali kamba nyoka viyamkongile mamo Eva kwa ubala wake wihile, na niye nodumba kamba mokwagilwa na fiyuko zinogile, kabili muleke kwilumbata na Kristo yaiyeka, kwiza muleke kungʼala.

⁴ Kilumbo mokwazaganya munhu yaheza kumwenu, kuno yobwililisa Yesu iyagwe, siyo yuja itumpeteleni; kabili muhengilwa na loho iyagwe, siyo yuja imbokele; hebu muhalongelwa Usenga uyagwe, siwo uja umvumile.

⁵ Viema nogesa kamba siswelila kinhu, kiwali nacho waja watumigwa wene ukulu kubanza wayawo.

⁶ Ihawa siifunzile ulonzi unogile, bali muna zifiyuko namgaga; higo tuwalagila hohose muna gamalangukizo getu.

⁷ Che, mbananga niye viniikumbakumba kumwenu, giladi mweye mwinuligwe; hebu mbananga vija viniwapetelani Longa da Mulungu bila kulihigwa kinhu?

⁸ Madale gayagwe nigaboka kwa kusola vinhu kumwawo, mhate kuwasanghanila mweye.

⁹ Haja hanikalile kumwenu, nghala bule kinhu, simgazile munhu; kilumbo iwandugu wezile kulawa Makedonia, wanyongezela gaja gaswelile; kabili niiteganya muna mbuli zose, nghale kumwenu sekeniwagaze, avo vivo vonda nheganye.

¹⁰ Nokiduwila ihoko ya Kristo ili kumwangu, matopa gangu higo honda ganenulwe muisi ya Ugriki (Akeya)!

¹¹ Giladi jake, habali siwalonda mweye? Mulungu kavimanya.

¹² Komu dinisanghana, nodibasiliza kusanghana, giladi niunange ubala wawo waja, wolonda ulegeho wa kwitopa kamba wanago magweka gagaja, gatuli nago tweye.

¹³ Kilumbo awo iwo watumigwa wa utungulu watendaga ubala, wokihindula kamba watumigwa wa Kristo.

¹⁴ Ago si ga kukanganya, kilumbo Mwenembago mwenyecho kaihindulaga kamba malaika mwene kungʼala.

¹⁵ Avo si mbuli nghulu, wasanghani wake na hewo wokihindula kamba wasanghani wene kupeta ugolofu; bali ikimambukizo chawo cholingana na sanghana zawo.

¹⁶ Nolonga chusa, munhu sekeyanigese kamba nambozi; bali muhangelegeza vivo, nivumileni kamba mbozi, na niye niitope hadodo!

¹⁷ Gonilonga sambi, ago sigalonga kamba malonga ga Mndewa, bali nogalonga kamba ga ubozi yeka, kilumbo tugavikila matopa.

¹⁸ Ihawa bwando wokitopa kimunhu, na niye nokitopa.

¹⁹ Kilumbo mweye mkalagale, mvumilaga wabozi!

²⁰ Mvumila munhu yowatenda watumwa, yomujani, yovisola vinhu vyenu na kuituniza, na kumtowani mvihanga!

²¹ Nokona kinyala kulonga, Tweye higo hatugadaha, tunyeka. Bali dihawa gweka jojose, munhu yagangamale mmoyo kuditopela, (nolonga ga ubozi) na niye nokitopela didija.

Matopa ga Paulo kilumbo cha migazo yake bwando

²² Hewo Waebrania? Niye vivo. Hewo wawo Waisraeli? Na niye vivo. Hewo wamlelo wa Abrahamu? Na niye vivo.

²³ Hewo wasanghani wa Kristo? Kamba mwene luwege nolonga, niwabanza; nghala nigaya nghani kubanza hewo; fungigwa kuwabanza, sunigwa kuwabanza, miyanza bwando behi ya kudanganika.

²⁴ Miyanza mitano nhowigwa na Wayuda fimbo milongo mine kuhunguza imwe.

²⁵ Miyanza midatu nhowigwa vinbongho na Waroma; mwanza umonga nhowigwa na mabwe, miyanza midatu merikebu yangu itulika mbahali, nghala mumo mmazi ikilo na imisi.

²⁶ Miyanza inyholile iyo bwando; mizanda inigaza, wabazazi wangaza, wanhu wa lukolo lwetu na walilingwa wangaza; nigazwa mviwambo na muluwala, hekaheka ja mbahali, migazo ya iwandugu wa uvwizi.

²⁷ Nghala ndumile kumwande ndonha, nghala mangweda miyanza bwando kulumizwa na nzala na nghilu; nimigwa chakuja miyanza bwando, nikigwa hadibeho ukulunge.

²⁸ Ago ga kunze gabanzwa na gaja gonizila mazuwa gose, vinigagaiya madale gose.

²⁹ Kamba kabaho yadonhile, aniye sidonhile? Kamba kabaho yatozelwe na niye sonile lusango?

³⁰ Nihananahizwa kwitopa, nokiitopela ukoka wangu.

³¹ Mulungu Tata wa Mndewa Yesu, Mwene kutunilwa digunge na digunge, kavitanga silonga utungulu.

³² Hiko Damasko mkulu wa diwambo, yali hasi ya mtawala Areta, kasepa idiwambo da Damasko, yangoge.

³³ Na niye wandavile hazonzo, mhulumuswa mumgelo mulukingigo, nihonyokwa mmakono gake.