2 Wakorinto 10 - Lagano da Isambi

Mhinde za nghondo yetu; ningo ya kwilingila

¹ Nowapembela mweye kwa uholo na unhu wa Kristo, niye Paulo wanongaga namdekedeke nihawa kumwenu, komu namkali nihawa kutali.

² Avo nompembelani sukumnanahize kutenda ukali vondamvike; mwenyego nogesa vinoga kuwagendela chalinze waja wayagwe, watulongaga kamba towinza dongho za lukuli.

³ Viyemela na tugendelele mzinghuli, bali hatwigombeleza kilukuli.

⁴ Kilumbo mhinde za nghondo yetu si za kilukuli, bali zizo mhiko za Kimulungu, zodaha kutula mhongono kamba zino, ngelegeza za ubala zobanangwa.

⁵ Vivija kuidundula kuinukilaga fiyuko za Mulungu, na ukalagavu wose wokululwa, wize kumtegeleza Kristo.

⁶ Avo muhamala kututegeleza, tweye twiika goya kulihila kila mwene bamila.

⁷ Che, gaja gonekaga mmeso mogateganya? munhu yahaigamba kamba komkola Kristo, nayawalange dino chusa, Viyomkola Kristo heyo, na tweye vivo tomkola!

⁸ Kilumbo honda ngeligwe kinyala, vilema nihabasiliza kwiitopela mhiko yetu iyatwinghile Mndewa, giladi tuwazenge, sukutuwabomole.

⁹ Silonda nyoneke kamba nomdumbizani kwa ulonzi wa mhwilili zangu.

¹⁰ Kilumbo wabaho wolonga, mhwilili zake ngaga, zina mhiko, bali uhammona mmeso, komona yanyekile, na malonga gake si kinhu.

¹¹ Munhu yolonga hivo nayavitange, Haviihasanya vija vitwandike kamba tuhawa haduhu, hebu vija vonda tusanghane kamba tuhawa baho.

¹² Viyemela hatudahile kulingana hebu kwigamba nawo wali kamba hivo, wokiitogola wenyego, komu wabule lutondo, kilumbo ningo yawo ya kwiilingila iwo wawo wenyego waiyeka, kabili woitagusa kwa ningo yawo iija.

¹³ Komu tweye tulema kwitopa kubita ningo, bali ningo yetu ikanhigwa na Mulungu, sukutukibanze kikomo, na hivo tuvika na kumwenu.

¹⁴ Kabili hatwitanula kamba vuwoitanula waja hawawavikila, kilumbo tweye twetwe tulongole kuwapetelani Usenga Unogile wa Kristo.

¹⁵ Vivija hatuibanza iningo kwa kwitopela sanghano za wayagwe, bali twibeta nhamanilo yenu ikule, baho na iningo yetu ya sanghano yokula, yobwagala kubanza ija ilongole.

¹⁶ Imalabaho toubwililisa Usenga Unogile na kumwawo wokalaga kutali kubanza mweye, kwa mzoko hatulonda kwitopa isi imalile kupetelwa Usenga Unogile na wayagwe.

¹⁷ Komu Mwene kwitopa nayaitopele gaja, Mndewa gayatendile!

¹⁸ Heyo yoitunila mwenyecho, kabule ugalu, komu yule yotunilwa na Bwana.