2 Timoteo 4 - Lagano da Isambi

Udipete dilonga hanogile na halekile kunoga

¹ Nokulagiza hakihanga cha Mulungu na cha Kristo Yesu yondayawataguse wanhu wose, wene ugima na waja wadanganike, na kwa kilumbo cha umbwelo wake na undewa wake:

² Udipete dilonga, basiliza nghani mazuwa gose hanogile na halekile kunoga; uhuguze wiho wawo, wakomhokele, wazume hamonga na kwazaganya na kuwalanguliza.

³ Kwa mzoko mazuwa gokwiza, aho wanhu wolema magweka ga ugima, wowinza ngelegeza zawo za dongho, kuno wozahila walangulizi bwando wano na wano, vuwogesa kuganogeza magutwi gawo.

⁴ Avo wohinduka, hondawahulike kabili ihoko, bali wokoleleza simo za utungulu.

⁵ Komu gweye ukalagale muna zimbuli zose, ufunye umoyo uhagaduswa vihile; tenda sanghano ya mpeta Usenga Unogile, mambukiza gaja gaulagizwe!

⁶ Kwa mzoko niye nammabehi kulavigwa kamba ngʼombe ya nhambiko, na kikomo changu cha kuileka imbago ino chammabehi.

⁷ Nihoma nghondo inogile, niumambukiza uchozi wangu, niiteganya inhamanilo.

⁸ Kwiza nogolelwa mulufiya wa mgoloko, kinikilwe na Mndewa Mtagusi wa ihoko, koningha siku dija, viyemela si nene niiyeka, komu na wose wanogelwe na umbwelo wake.

Mbuli za wayage Paulo

⁹ Wiyohe kwiza kumwangu mbwisa!

¹⁰ Kilumbo Dema kandeka, kanogela imbago ino, kachola Tesalonike; Kreske kachola Galatia, Tito kachola Dalmatia.

¹¹ Luka kabaha kaiyeka hamonga na niye; na gweye umsole Marko mwize hamonga, kilumbo kanhazaga kunisanghanila.

¹² Tikiko nimgala Efeso.

¹³ Joho dija dinilekile kuchugu kwa Karpo hiko Troa, uheza ungalile hamonga na vitabu, na vija vigongomanywe kwa mikwembe.

¹⁴ Ija muhunzi Alesandro kanhendela gehile bwando; Mndewa komulihila, kamba sanghano zake vizikalile.

¹⁵ Na gweye umteganye, kilumbo kabamila nghani malonga getu!

¹⁶ Vinitaguswe mwanza wa ichanduso, haduhu munhu kumwambu wangu yenuke yanisindile, wose wandeka; komu nowatambikila, walekeselwe.

¹⁷ Komu Mndewa kema umwambu wangu, kanigangamaza giladi nimambukize kuupeta Usenga, ngholo zose wauhulike; na niye mhonyokwa mmlomo wa nyama songo.

¹⁸ Vivo Mndewa vondayanghombole muli gehile gose nihone, na kwingila muundewa wake wa kuulanga; Heyo yatunizwe milongo yose digunge na digunge, Amina!

¹⁹ Ndamusila Priska na Akila, na wali mngʼanda ya Onesiforo!

²⁰ Erasto kasigala Korinto; Trofimo nimuleka mtamu hiko Mileto.

²¹ Wiyohe wize, zihali siku za kihuhwe hazinavika. Wokulamusa Eubulo, Pude, Lino, Klaudia na ndugu wose.

²² Mndewa yakale na loho yako. Uholo uwakalile mweye mose!