2 Timoteo 3 - Lagano da Isambi

Nhamanilo yene kuikunga kamba ya Yane na Yambre

¹ Uvitange kamba siku za ikimambukizo golawilila mazuwa ga mkwekwe.

² Kwa mzoko wanhu wogalamka wainogele wenyecho, wagesa mhiya, wene matopa na kwidundula, wene maligo, hawawahulikaga wavyele wawo; walibule nhogo hebu kidumbo.

³ Hawanogelaga wayawo, hawatamanilagwa, wadesi; hawateganya mbuli, hawalondaga kuzumwa, wehilaga ganogile gose.

⁴ Wahonzaga wayawo, wagelaga chevu, wokikunga, hawamlondaga Mulungu komu dongho zawo.

⁵ Walagusilaga nhamanilo ya kunze, bali mhiko za kumtogola Mulungu wozilema; avo gweye winege nawo!

⁶ Kilumbo wayagwe iwo waja wanyalukilaga mangʼanda ga wanhu, kuno wokonga watwanzi waja wapotigwe na matozo, wagogigwe na dongho bwando.

⁷ Watwanzi hiwo waifunzaga mazuwa gose, hawadaha kuivika ihoko waitange.

⁸ Kamba waja Yane na Yambre (Waganga wa Farao) vuwambamilile Mose, na hewo vivo wobamilaga ga ihoko, wagalamka wanhu wabanangika nzewele, walemelwa na magweka ga inhamanilo.

⁹ Bali hondawagendelele nghani, kilumbo ubananzi wawo wolawilila chalinze hameso ga wanhu wose, kamba vuwakalile waja Yane na Yambre.

Igoge na Jandiko dingʼalile, dihuzilwa na iloho

¹⁰ Komu gweye kuwambilila malangulizo gangu na uchozi wangu, ngelegeza, nhamanilo, uholo, unogelo na mwazaganyo wangu;

¹¹ vivija swatizo na migaduko inipatile kuja Antiokia na Ikonio na Listra, na vija vyose vingazigwe, bali Mndewa kanihonya muna zimbuli zija zose.

¹² Viyemela wose wolonda kumdumba Mulungu kwa kumkoleleza Kristo Yesu, iwandama kuwingwa.

¹³ Komu waja wehile wagelaga wanhu kiswalu, wobasiliza uwiho wawo, kuno wokonga, kabili wokikonga wenyecho.

¹⁴ Bali gweye ugagoge gaja gaulangukizwe, kuno uwagesa waja wakulangulize!

¹⁵ Na kwa kilumbo vuudimanyile Jandiko Dingʼalile kulawa unghele wako, dokwingha nghungwe za kuhonela, uhamtogola Kristo Yesu.

¹⁶ Kilumbo Jandiko jose dihuzilwe na Loho wa Mulungu, dotulongoza muna gamalangulizo na kugananga matozo, kwa kuhuguza wanhu na kuwazuma, giladi wavike mwihoko.

¹⁷ Avo munhu wa Mulungu kogangamala, kogongomanywa yasanghane ganogile gogose.