2 Timoteo 2 - Lagano da Isambi

Ugalamke asikali mgaga wa Kristo Yesu

¹ Avo gweye mwanangu ugalamke mgalu kwa uholo ulawaga kumwake Kristo Yesu!

² Na magweka gaja gauhulike kumwangu havihanga vya wanhu bwando, uwafumbike wanhu watamanilwa wondawadahe kulangukiza wayagwe!

³ Funya umoyo uhagaya vihile hamonga na niye, kamba vimgambile asikali mgaga wa Kristo Yesu!

⁴ Kuduhu asikali yochola kuli nghondo, yozahila masumo gake mwenyecho, giladi yamnogeze imkulu wa inghondo.

⁵ Kabili munhu yokikuga na wayage mumchezo, hagwelelwa utango wa kihumo, kamba haikugile vigambile.

⁶ Mulimi yagaduke kumgunda, imgamba kuutomola mujo wake. Uvitange goya gonilonga; Mndewa kokwingha fiyuko muna gamagweka gose.

⁸ Umgese Yesu Kristo yazukile kulawa kwa wafile, yaleligwe muna ulukolo lwa Daudi, kamba vinipetile muusenga unogile!

⁹ Kwa kilumbo hicho ngaduswa vihile, fungigwa kamba mbokonyo; komu Longa da Mulungu hadifungagwa.

¹⁰ Avo nokwazaganya gose kwa giladi ja wasaguligwe, na hewo wayone nghombola ija izile na Kristo Yesu hamonga na yenzi ya idigunge.

¹¹ Longa dino dijo da ihoko: Kamba tuhadanganika hamonga na Heyo, togalamka wapile hamonga na Heyo.

¹² Kamba tuhafunya umoyo, totawala hamonga na Heyo. Kamba tuhambela, na Heyo kotubela.

¹³ Kamba tweye hatumtamanile, Heyo kosigala yotamanilwa, hadaha kuibela mwenyecho.

Winege na simo za wehu, galamka kiya chene nhogolwa

¹⁴ Wakumbuse Magweka higo na kuwazuma hakihanga cha Mulungu, sukuwebamilile mbuli zija zilibule lutondo, zibanangaga waja wozihulika.

¹⁵ Gangamala kwilaviliza msanghani mgaga wa Mulungu yalibule na kinghwaso cha kinyala; ulangulize vigambile Longa da ihoko!

¹⁶ Winege na simo za wehu hazigondanya na inhamanilo, kilumbo zibasiliza nghani ubananzi.

¹⁷ Ulonzi hiwo okwenela kamba londanzimu; mmwanza wawo iwo Himeneo na Fileto.

¹⁸ Waileka nzila ya ihoko, kuno wolonga kamba kiyama kingila, wahohotola inhamanilo ya wanhu bwando.

¹⁹ Komu nghwambaza ya Mulungu igangamala, na utango wake ulonga vino, Mndewa kawatanga wanhu wake; kabili, Munhu yoditambula twaga da Mndewa, nayaleke ganyolodoke!

²⁰ Mngʼanda nghulu tokona nongo na viya bwando, viyagwe vya zahabu hebu feza, viyagwe vya mbiki hebu ulongo; viyagwe vya nhunizo, na viyagwe vya bule nhunizo.

²¹ Ihawa munhu kaingʼaza kwa kuinega na higo ganyolodoke, kogalamka kiya cha nhogolwa kisunhigwe, kimnogeza Mndewa, kigongomanywa kwa sanghano zose zinogile.

²² Avo zikimbile dongho za umhale, uwinze ihoko na nhamanilo, nogelo na tindimalo hamonga na wose womkema Mndewa kwa moyo ungʼalile!

²³ Uleme ulonzi wa bamila ulibule fiyuko, uvitange kamba ulelaga magomba.

²⁴ Msanghani wa Mndewa havinogile yawe mdwanzi, bali yahole, yadahe kulangukiza, yawe mfunya umoyo.

²⁵ Kabili yawazume kwa udekedeke waja wombamilila, giladi kamba vihadahika, Mulungu yawenghe mgaluko wa kuitanga ihoko;

²⁶ wabwelwe na nzewele zawo, walawe muli umtego wa Mwenembago, viyemela heyo yuyo yawakwedule, wamsanghanile gaja goyolonda.