1 Yohana 5 - Lagano da Isambi

Kihumo cha nhamanilo. Usindi wa Loho na mazi na mulopa

¹ Munhu wowose yomtogola Yesu kamba yuyo Kristo, kaleligwa na Mulungu; kabili munhu wowose yomnogela yuja yalelile, komnogela na yuja yaleligwe nayo.

² Avo vivo tuvitanga kamba towanogela wana wa Mulungu, tuhamnogela Mulungu na kuzigoga ndagizo zake.

³ Kilumbo ako kuko kumnogela Mulungu, kamba tuhazigoga ndagizo zake, viyemela ndagizo zake si ngaga.

⁴ Kwa mzoko kinhu chochose kileligwe na Mulungu, chohuma ulumwengu; na kino kicho kihumo kihumaga ulumwengu, iyo nhamanilo yetu.

⁵ Yuyo yalihi mwene kuuhuma ulumwengu, komu yuja yomvumila Yesu yuyo Mwanage Mulungu?

⁶ Yesu Kristo yuyo yezile kwa mazi na mulopa; si mazi gayeka, bali mazi na mulopa;

⁷ na Heyo Loho yuyo yosindila, kilumbo Loho iyo ihoko. Kwa mzoko wabaho wadatu wohumiza kuulanga: Tata na Longa na Loho Yangʼalile, na wadatu hiwo iyo yumwe.

⁸ Imala wakuko wadatu wohumiza muisi: Loho, mazi na mulopa, na wadatu hiwo waiduganya kwa mbuli imwe.

⁹ Tuhabokela usindi wa wanhu, usindi wa Mulungu uwo mkulu kubanza, kwa mzoko usindi wa Mulungu uwo uno umsindile Mwanage.

¹⁰ Munhu yondayamtamanile Mwana wa Mulungu, kanawo usindi mgati mmwake; yalemile kumtamanila Mulungu, kamtenda kamba mvwizi, kilumbo hauvumile uja usindi, Mulungu uyamsindile Mwanage.

¹¹ Na usindi uja uwo uno kamba Mulungu yatugolele ugima wa idigunge, na ugima hiwo wolawa kwa Mwanage.

¹² Heyo yali na Mwana, kanawo upile; na heyo yalibule Mwana wa Mulungu, kabule upile.

Gangamaleni mkupula; gakuko matozo gakomaga

¹³ Magweka higo niwandikilani mweye mditogole tagwa ja Mwanage Mulungu, giladi mgatange kamba munawo upile wa idigunge.

¹⁴ Na dino dijo gangamalo dituli najo kumwake, Kamba tuhapula kinhu kigoloke muna manogelwa gake, kotuhulika.

¹⁵ Kabili tuhavitanga kamba kotuhulika kitupula chochose, avo tuvimanya vivo kamba tuvibokela.

¹⁶ Munhu yahamona ndugu yake yotoza tozo hadikomaga, nayamtambikile kwa Mulungu; avo Mulungu komwingha ugima hamonga na waja watendile matozo hagakomaga; dabaha tozo jandakane na kifo; silonga kamba munhu yatambikile kwa kilumbo hicho.

¹⁷ Ubananzi wowose dijo tozo, komu dabaha tozo dilekile kugala kifo.

¹⁸ Tuvitanga kamba munhu yaleligwe na Mulungu, hatenda tozo, komu Yuja Mwana wa Mulungu komwimiliza, avo Mwenembago hondayamkwase.

¹⁹ Tuvimanya kamba twawanhu wa Mulungu, na imbago yose itawaligwa na yuja Mwenembago.

²⁰ Tuvimanya kamba Mwana wa Mulungu keza, na heyo katwingha fiyuko za sambi, tumtange heyo Mwene ihoko; avo twamgati mmwake Mwene ihoko na mwa Mwanage Yesu Kristo.

²¹ Yuyo Mulungu wa ihoko, na ugima wa idigunge. Mweye wana wadolo, iteganyeni, mwinege na vinyago.