1 Yohana 4 - Lagano da Isambi

Mzigeze loho za wanhu, kumbe zitogolaga lukuli lwa Yesu

¹ Mweye wanogelwa, sukumvumile munhu wowose yokwiza na mbuli ya loho, komu zigezeni loho kamba zilawa kwa Mulungu; kwa mzoko walaguzi bwando wene uvwizi walawilila mulumwengu.

² Avo vivo vondamumtange Loho wa Mulungu: kamba yahamvumila Yesu Kristo kagalamka munhu, hiyo iyo ilawile kwa Mulungu.

³ Komu loho yoyose ilemaga kumtogola Yesu, hiyo hailawile kwa Mulungu; iyo loho ija imkuga Kristo, viyemela muhulika kamba yokwiza, na vino sambi ivika mulumwengu.

⁴ Mweye wana wadodo, mwawanhu wa Mulungu, muwahuma waja, kwa mzoko Heyo yali mgati mmwenu yuyo mkulu kubanza yuja yali muno mulumwengu.

⁵ Wawo walawile mulumwengu, kabili wolonga magweka ga ulumwengu, na ulumwengu owahulika.

⁶ Tweye tulawa kwa Mulungu, avo munhu yomtanga Mulungu, kotuhulika; komu yuja halawile kwa Mulungu, hondayatuhulike; avo vivo vondatuitange Loho ya ihoko hebu loho ya kutotola.

Mulungu dijo Nogelo, Heyo kokala mgati mmwetu

⁷ Mweye wanogelwa, natwinogele twetwe kwa twetwe, kilumbo unogelo wolawa kwa Mulungu, na munhu mwene nogelo kaleligwa na Mulungu, na heyo kamtanga Mulungu.

⁸ Munhu yalibule nogelo, ayo hamtangile Mulungu, kwa mzoko Mulungu dijo nogelo!

⁹ Aho Mulungu viyamgalile Mwanage Nyadimwe Waidiwangala mulumwengu giladi yatubweze kuugima, baho nogelo da Mulungu vivo dilawilile kumwetu.

¹⁰ Avo vivo nogelo viditangika: si kamba tweye tumnogela Mulungu, bali Heyo katunogela tweye, kamtuma Mwanage yagalamke muhanga kwa kilumbo cha matozo getu.

¹¹ Mweye wanogelwa, ihawa Mulungu katunogela hivo, itwandama na tweye kwinogela.

¹² Haduhu munhu yamonile Mulungu milongo yose; tuhainogela, baho Mulungu kokala mgati mmwetu, na nogelo jake diiduganya kumwetu.

¹³ Avo vivo vitutanga kamba tokala mgati mmwake, na Heyo mgati mmwetu, kilumbo katugolela Loho yake.

¹⁴ Na tweye tuvona na kusindila kamba Tata kamgala Mwana, yagalamke Mkombola wa ulumwengu.

¹⁵ Munhu yondayamvumile Yesu kamba yuyo Mwanage Mulungu, Mulungu kokala mgati mmwake, na heyo mgati mwa Mulungu.

¹⁶ Avo tudimanya na kuditamanila nogelo hijo, diyali najo Mulungu kumwetu; Mulungu ijo nogelo, na heyo yakalaga muna dinogelo, kokala mgati mwa Mulungu, na Mulungu kokala mgati mmwake.

Nogelo dabule bwembwe, tusongile kunogelwa

¹⁷ Avo vivo dinogelo vondadiiduganye kumwetu, giladi tugangamale muna disiku ja nhaguso, kilumbo kamba Heyo vayali, na tweye vutuli muno mulumwengu uno.

¹⁸ Muna dinogelo mduhu bwembwe, bali nogelo dihagangamala, dowinga bwembwe; kwa mzoko bwembwe dilumizaga, na munhu yahawa na bwembwe, hanagangamala muna unogelo.

¹⁹ Tweye tumnogela Mulungu, kwa mzoko Heyo kalongola kutunogela tweye.

²⁰ Munhu yahalonga, Nimnogela Mulungu, na heyo kamwihila ndugu yake, ayo mtungulu; kwa mzoko yahalemelwa kumnogela ndugu yake iyomona, kodahaze kumnogela Mulungu, viyemela hanamona?

²¹ Lagizo dino dijo twinghigwe na Heyo kamba, yuja yomnogela Mulungu, yamnogele na ndugu yake.