1 Yohana 3 - Lagano da Isambi

Tweye wana wa Mulungu tukigoge kibetelo chetu

¹ Loleni unogelwa ulihi Tata uyatwinghile giladi tukemigwe wana wa Mulungu, na tweye vivo tuli; kilumbo hicho imbago haitutangile, kwa mzoko haimtangile Mulungu.

² Wanogelwa zangu, vino sambi twawana wa Mulungu, bali tanhu havinakoneka vondatugalamke; komu tuvitanga, Vondayalawilile, togalamka kamba Heyo, kwa mzoko tomona kamba viyali.

³ Munhu wowose yobeta higo, koingʼazula mwenyecho kamba Heyo viyangʼalile.

⁴ Munhu wowose yatendile matozo, kaihasanya na Mulungu, kilumbo kutoza kuko kuihasanya na Mulungu.

⁵ Na mweye mvitanga kamba Heyo kalawilila, giladi yagasegeze matozo, viyemela Heyo kabule matozo.

⁶ Munhu yahakala mgati mmwake, hondayatoze; komu yuja yotenda matozo, hamuwene Heyo, viyemela hamtangile.

⁷ Mowana wadodo, munhu sekeyawakonge! yuja yotenda ga ihoko, kana ihoko kamba Heyo viyali na ihoko.

⁸ Na yuja yotenda matozo yuyo munhu wa Mwenembago, kilumbo Mwenembago katendaga matozo kulawa ichanduso; kwa giladi dino Mwana wa Mulungu kalawilila, yazibanange sanghana za Mwenembago.

⁹ Munhu yaleligwe na Mulungu, hatenda matozo, kwa mzoko mbeyu yake yokala mgati mmwake, avo hadaha kutenda matozo, kilumbo kaleligwa kulawa Mulungu.

¹⁰ Muna mbuli ino mbagu wokoneka, waja wana wa Mulungu na waja wana wa Mwenembago: munhu wowose yalekile kutenda ihoko, kabili hamnogele ndugu yake, halawile kwa Mulungu.

¹¹ Kilumbo uno uwo usenga umuhulike kulawa ichanduso, kamba twetwe kwa twetwe tuinogele;

¹² si kamba Kaini yalawile kwa yuja Imndumu, kamkoma ndugu yake. Avo habali yamkomile? Kilumbo sanghana zake zikala zihile, na sanghana za ndugu yake zikala za ihoko.

Wihilo wa imbago wabaha, maza twinogele kindugu

¹³ Sukumkanganye mwandugu zangu, ihawa imbago imwihilani.

¹⁴ Tuvitanga kamba tubita kulawa mkifo kwingila kuna ugima, kwa mzoko tuwanogela ndugu; yuja yalibule unogelo, ayo kokala mkifo.

¹⁵ Munhu yomwihila ndugu yake, ayo yuyo mkoma wanhu, na mweye mvitanga kamba mkoma wanhu kabule ugima wa idigunge mgati mmwake.

¹⁶ Aho Yesu viyalavile ugima wake kwa kilumbo chetu, baho tutangile unogelo wa ihoko vuuli; avo itwandama na tweye kuulava ugima wetu kwa kilumbo cha ndugu zetu.

¹⁷ Komu munhu yahawa na mhiya bwando, imalabaho kamona ndugu yake kana nzala, kalema kumonela bazi, che, unogelo wa Mulungu womkalila vilihi munhu yuja?

¹⁸ Mweye wana wadodo, sikutunogele munhu kwa mulomo hebu kwa lulimi, bali kwa sanghana za ihoko!

¹⁹ Avo kwa mbuli zino toitanga kamba twawanhu wa ihoko, na miyoyo yetu yokituza hakihanga chake.

²⁰ Viyemela kamba miyoyo yetu ihatutagusa, Mulungu yuyo mkulu kubanza miyoyo yetu, na Heyo kagamanya gose.

²¹ Mweye wanogelwa, miyoyo yetu kamba haitutaguse, togangamala ha Mulungu;

²² na mbuli yoyose yondatupule, tobokela kumwake, kwa mzoko tuzigoga ndagizo zake na kusanghana gamnogeze.

²³ Zino zizo ndagizo zake, tuditogole twaga da Mwanage Yesu Kristo na kwinogela twetwe kwa twetwe kamba viyatulagize.

²⁴ Munhu yozigoga ndagizo zake, kokala mgati mmwake, na Heyo mgati mmwake. Kabili tovitanga vilihi kamba kokala mgati mmwetu? – kilumbo katwingha Loho yake!