1 Yohana 2 - Lagano da Isambi

Yesu yuyo mlombabazi wetu, katwingha ndagizi ya sambi

¹ Mweye wanangu wadodo, nowandikila gano giladi sukumtoze; na kamba munhu yahatenda matozo, twinghigwa Mlombabazi kwa Tata, iyo Yesu Kristo mwene ihoko.

² Heyo yuyo mduganyo kwa matozo getu, viyemela si kwa kusegeza matozo getu gayeka, bali na gaja ga ulumwengu wose.

³ Avo ihawa tuzigoga ndagizi zake, tohuguza kamba tumtanga Mulungu.

⁴ Munhu yolonga, nimtanga, bali hazigoga ndagizi zake, heyo kolonga utungulu, na ihoko yamduhu mgati mmwake.

⁵ Komu heyo yodigoga Longa jake, ayo unogelo wa Mulungu ukunguluka kumwake, ubanza dikongola, avo tovimanya kamba twamgati mmwake.

⁶ Munhu yolonga kamba kokala mgati mmwake, imwandama yatende uchozi kamba Heyo viyakalile yochola.

⁷ Mweye wanogelwa, siwandikila ndagizi ya sambi, bali ndagizi ya umwaka mkalile nayo kulawa ichanduso; na Longa dimuhulike iyo ndagizi ija ya umwaka.

⁸ Kabili nowandikila ndagizi ya sambi, iyo yogalamka ya ihoko kumwake na kumwenu, kilumbo ziza dobita, na uja umlangaza wa ihoko usonga kungʼala.

⁹ Munhu yolonga kamba kamumo mmlangaza, na heyo komwihila ndugu yake, ayo kamdiziza na dilelo.

¹⁰ Yuja yomnogela ndugu yake, kokala mumlangaza, viyemela mgati mmwake mduhu kinghwaso.

¹¹ Ayuja yomwihila ndugu yake, ayo yahali mdiziza, kabili kochola mdiziza, viyemela hamanyile koyochola, kilumbo ziza dimtulaga meso.

Vitulumba kuhunia nongwa za imbago

¹² Nowandikila mweye wana wadodo, kilumbo matozo genu mlekeselwa kwa twaga jake.

¹³ Nowandikila mweye kina tata, kilumbo momtanga Yuja wa ikilongozi; nowandikila mweye wamhale, kilumbo mumuhuma yuja imbananzi.

¹⁴ Niwandikila mweye wana wadodo, kilumbo mumtanga Tata: niwandikila mweye kina tata kilumbo mumtanga Yuja wa ikilongozi; niwandikila mweye wamhale, kilumbo mgangamala, na Longa da Mulungu dikala mgati mmwenu, na mweye mumuhuma yuja mbananzi.

¹⁵ Sukumwinogele imbago ino hebu magweka galimumo muna imbago; munhu yahainogela imbago, kumnogela Tata kwamduhu mgati mmwake.

¹⁶ Kwa mzoko vyose vili muli imbago zizo dongho za lukuli, dongho za meso na chodo cha ugima, havilawaga kwa Tata, bali volawa muna imbago.

¹⁷ Na ino imbago yobita hamonga na dongho zake, komu heyo yogavikiza goyolonda Mulungu, kokala digunge.

Yomkuga Kristo hauzigililo viyombela Mwana

¹⁸ Mowana wadodo, uzigililo wammabehi; na kamba vija vumuhulike kamba yuja yomkuga Kristo kokwiza, viyemela na dilelo bwando womkuga Kristo wabaho; avo tovitanga kamba icho kipigiti cha ikimambukizo.

¹⁹ Viyemela walawa kumwetu, komu hawagalamka wa kumwetu, kwa mzoko kamba wagalamke wa kumwetu, wakalile hamonga na tweye; komu giladi wagubulwe kamba hawakalile wose kumwetu.

²⁰ Bali mweye mbakazwa mavuta na Yuja Yangʼalile, avo mweye mose ago mgamanya.

²¹ Niwandikila mweye si kamba hamwitangile ihoko, bali mwitanga, kabili mvitanga kamba uvwizi wowose haulawa mwihoko.

²² Mvwizi yuyo yalihi komu yuja yobela kamba Yesu yuyo Kristo Mndewa? ayo yuyo yokikuga na Kristo; heyo kombela Tata hamonga na Mwana.

²³ Munhu yombela Mwana, kabule Tata; yomvumila Mwana, kokuwa nayo Tata vivija.

²⁴ Mweye gaja gamuhulike ichanduso, gakale mgati mmwenu; avo gahakala mgati mmwenu gamuhulike ichanduso, baho vondamwigondanye na Mwana na Tata.

²⁵ Uno uwo usenga uja uyatupetele, uwo upile wa idigunge.

²⁶ Niwandikila gano kwa kilumbo cha wanhu waja wolonda kumwagizani.

²⁷ Bali mweye mavuta gaja gampatile kumwake, gahakala mgati mmwenu, hondamsulukile kulangukizwa na munhu, komu kamba mavuta gake vigowalangukiza magweka gose, iyo ihoko.

²⁸ Avo sambi mweye wana wadodo, kaleni mgati mmwake, giladi Kristo vondayalavilizwe chalinze, mgangamale, sukumugwe kinyala hakihanga chake, kwa vija vondayeze!

²⁹ Mweye muhavitanga kamba Heyo yuyo Mwene ihoko, avo vimanyeni kamba munhu yotenda ga ihoko, kaleligwa na Mulungu.