1 Yohana 1 - Lagano da Isambi

Upile ulavilizwa tuchole mumlangaza wake

¹ Dija dikalile haikilongozi, dituhulike, dituwene kwa meso getu, ditulolile na kubabasa na makono getu, dijo Longa da Upile ditupetaga.

² Na upile uja ulavilizwa, na tweye tuwona, avo tousindila na kuwapetela mweye uja upile wa idigunge, ukalile kwa Tata, utulawilila.

³ Ajo dituwene na kudihulika, todibwililisa kumwenu, giladi na mweye mwigondanye hamonga na tweye, kamba tweye vitwigondanya hamonga na Tata na Mwanage Yesu Kristo.

⁴ Gano tugandika, giladi ndengha yenu iiduganye.

⁵ Na uno uwo usenga utuhulike kumwake, utupeta kumwenu, kamba Mulungu uwo mulanganza, kabili ziza jose hamduhu mgati mmwake.

⁶ Tuhalonga kamba twigondanya hamonga na Heyo, kabili tuhachola mdiziza, tolonga utungulu, hatutenda ga ihoko.

⁷ Komu tuhachola mumlangaza kamba Heyo vayali mumlangaza, tokigondanya twetwe kwa twetwe, na mulopa wa Mwanage Yesu wotusunha matozo gose.

⁸ Tuhalonga kamba twabule matozo, tokivwizila wenyecho, viyemela ihoko yamduhu kumwetu.

⁹ Bali tuhagalava matozo getu, Heyo yuyo mtamanilwa, wa ihoko, kotusegezela matozo gose na kutusunha, uponela wose utulawe.

¹⁰ Tuhalonga kamba hatutozile, tomtenda Heyo mtungulu, avo Longa jake damduhu kumwetu.