1 Wakorinto 9 - Lagano da Isambi

Paulo kaikwima ndagizi yake kilumbo cha usenga; Munhu yakomboligwe kagalamka mtumwa wa wose

¹ Che, niye sikomboligwe? Niye sili mtumigwa? Niye simonile Mndewa wetu Yesu? Mweye hamuli mujo ulawile msanghano zangu, zinimsanghanile Mndewa?

² Kwa mzoko nanileke kuwa mtumigwa wa wayagwe, bali kumwenu yuyo nene; kilumbo mweye mwa utango wa utumigwa wangu, kwa vija vumgoga Mndewa.

³ Uno uwo usindi wangu kumwawo wene kuniuzagiza.

⁴ Che, na tweye vilihi hatudaha kuja na kungʼwa chochose?

⁵ Che, na tweye hatudaha hohose hotuchola, kwilongoza na sano yali mkristo, kamba vuwotenda watumigwa wayagwe, na ndugu wa Mndewa, na Kefa?

⁶ Hebu mwagiza niye na Barnaba tuliyeka hatudaha kubokela mandiya kulawa kwa madale, komu tusanghane na makono getu wenyego?

⁷ Silikali yalihi yacholile kuli inghondo, ilawabaho yailihile mwenyecho? hebu yalihi yahandile mitongoni, yalekile kuja umujo wake? hebu mchunga yalihi mwene dale da ngʼombe, yalekile kungʼwa matombo ga didale?

⁸ Gano sigalonga kimunhu kiyeka, komu Inzuma iyo ilongile higo.

⁹ Kilumbo yandikigwa muna inzuma ya Mose, Ngʼombe yohugusa muhunga, sukuumdaze mulomo. Che, aho Mulungu koteganya mbuli za ngʼombe?

¹⁰ Hebu hagalonga higo kwa kilumbo chetu? Kwa ihoko yandikigwa kwa kilumbo chetu, kilumbo mnghulima na yuja mwene kuhugusa wose wobeta kugolelwa fungu jawo.

¹¹ Na tweye kamba tumuhandilani mbeyu ya kiloho, mbuli nghulu ilihi, kamba tuhahuna vinhu vyenu vya mulukuli?

¹² Ihawa wayagwe waigondanya woja kumwenu, tweye hondatubanze? bali tweye hatutendile magweka higo, komu twazaganya gose, giladi sikutugele nghwalo muna inzila ya Usenga Unogile wa Kristo.

¹³ Hamvimanyile kamba waja wosanghana muna idihekalu, wajaga vinhu vya Hekalu, na waja wasikaga ngʼombe za nhambiko, wogolelwa fungu jawo bahaja hasikilo?

¹⁴ Avo vivo na Heyo Mndewa kalagiza, waja wene kubwililisa Usenga Unogile wenghigwe mandiya mumo muna Usenga Unogile.

¹⁵ Bali niye sisanghane magweka kamba higo, vyemela sigandika gano giladi ninghigwe; kwa mzoko vinoga nife kamba munhu yoyose yamboke ino nhunizo yangu!

¹⁶ Kilumbo nihapeta Usenga Unogile, nabule cha kwitopela, kwa mzoko inyandama, kabili nojona mwenyecho nihaleka kuupeta Usenga Unogile.

¹⁷ Nihagasanghana gano kwa manogelwa gangu, baho nogwelelwa kitumetume; komu nihagatenda kwa kunanahizwa, notamanilwa msanghano ino mgolelwe.

¹⁸ Avo miyawi yangu iyo ilihi? Iyo ino kamba nihaupeta Usenga, silonda kwinghigwa kinhu, hebu kuwila magweka gaja gandakane kumwangu kwa kilumbo cha Usenga Unogile, nigakape.

¹⁹ Avo niye nghomboligwa muutumwa wose, nigalamka mtumwa wa wose, giladi niwakwege wanhu bwando wamkole Kristo.

²⁰ Kwa Wayuda ngalamka kamba Muyuda, giladi niwakwege Wayuda; kwa waja woigoga Inzuma, ngalamka kamba mgoga mwizilo, giladi niwakwege waja wagogile mwizilo, vyemela niye nabule mwizilo.

²¹ Kwa waja walibule Inzuma, ngalamka kamba nilibule Inzuma, giladi niwakwege walibule Nzuma; si kamba niye nabule nzuma ya Mulungu, komu namwene Inzuma ya Kristo.

²² Kwa waja wene nhamanilo ndodo ngalamka kamba miyawo, giladi niwakwege waja wene nhamanilo ndodo; ngalamka kamba vuwali hewo wose muna gamagweka gose, giladi niwakwege hohose wene kukomboligwa.

²³ Na higo nogasanghana gose kwa kilumbo cha Usenga Unogile, giladi nigwelelwe fungu jangu mumo hamonga na wayagwe.

²⁴ Che, hamtangile kamba waja wokikuga kwa kukimbila, wokimbila wose, bali yonda yagwelelwe imiyawi iyo yumwe yaiyeka? Avo na mweye vivo kimbileni nghani, giladi mgolelwe!

²⁵ Komu munhu yokikuga na wayage, tanhu kalekaga gose; awo wokiyoha giladi wabokele miyawi ibanangikaga, komu tweye tobokela miyawi ija haibanangikaga.

²⁶ Vilema na niye nokiyoha kukimbila vivo, si kamba siumanya uzigililo; nosuna nghonde, si kamba nghonde zangu nozasa yamba.

²⁷ Komu nokengheza lukuli lwangu, kuno nolugadusa lunhegeleze, giladi niye nihawapetela wayagwe, mwenyecho kwiza sikunyasigwe.