1 Wakorinto 8 - Lagano da Isambi

Kuja nyama zikomelwe milungu yungwa; sikuumuhonze miyago

¹ Mweye mnyandikila kamba vodahika kuja nyama za nhambiko, kwa mzoko tweye chose tuna fiyuko; komu niye nolonga, Fiyuko zigelaga matopa, bali unogelo uwo uzengaga.

² Munhu yeheyagiza kamba katanga mbuli, heyo hatangile mbuli yoyose tanhu kamba vimgambile kutanga.

³ Bali munhu yahamnogela Mulungu, katambuligwa na Mulungu.

⁴ Tuhagesa mbuli ya kuja nyama zija zilavigwe kwa kutambikila vinyago, tuvimanya, Kuduhu kinyago cha kudumbiza muno mulumwengu, kabili kuduhu Mulungu iyagwe komu imonga yaiyeka.

⁵ Vyemela kamba yabaho ikemigwa milungu kuulanga hebu mulumwengu, – kilumbo milungu bwando yosanghanilwa, na mabwana iwo bwando –

⁶ bali kumwetu tweye Mulungu yuyo Yumwe iyo Tata, vyemela vinhu vyose vilawa kumwake, na tweye twawanhu wake; kabili Mndewa yuyo imonga, Yesu Kristo, vyemela vyose viumbigwe kwa giladi jake, na tweye twabaho kwa giladi jake.

⁷ Bali si wose wene fiyuko zino. Kwa kilumbo hicho wayagwe vuwazowele umwaka kutambikila vinyago, na dilelo kamba wahazija nyama, wowalanga zizo za vinyago, na miyoyo yawo kwa kunyeka yobanangika, kuno wogesa kamba watoza.

⁸ Avino tuvimanye goya kamba hatudaha kumkwenhukila Mulungu kwa nzila ya mandiya: kamba tuhaja, haduhu chondatongezelwe; hebu kamba tuhaleka kuja, haduhu chondatuswele.

⁹ Komu teganyeni kamba muhadaha kuja mweye, sukumuwahonze waja ndugu wene nhamanilo ndodo!

¹⁰ Kwa mzoko gweye mwene zifiyuko zija uhakala mngʼanda ya kutambikila vinyago, kuno uja nyama hameso ga miyago yuja mwene nhamanilo ndodo, che, hondavimswagize na heyo yaije nyama ija, kuno yogesa kamba katoza?

¹¹ Avo yuja mwene nhamanilo ndodo kokwangamila kwa kilumbo cha fiyuko zako; na heyo kagamba ndugu, vilema Kristo kamdanganikila na heyo!

¹² Muhawagela mmatozo ndugu zenu, na kuwagela milonda mmiyoyo yawo inyekile, avo momtozela Kristo mwenyecho.

¹³ Vyemela ihawa nomuhonza ndugu yangu kwa chakuja changu, hondandiye nyama ya nhambiko milongo yose, giladi sikunimuhonze ndugu yangu.