1 Wakorinto 7 - Lagano da Isambi

Mkasano na sano jake wakale hamwe; Havilumba kwiyasa, kaleni vumkemigwe

¹ Vyemela mbuli zija zumnyandikile kamba vinoga munhu yaleke kukwasa mtwanzi?

² Na niye nokwidika vino, Kwa kilumbo cha ugoni vinoga mbigalo wowose yawe na mwehe wake mwenyecho, na mtwanzi yawe na mkasano wake mwenyecho.

³ Bali mbigalo yamwinghe mwehe wake gamwandakane, na heyo mtwanzi yamwinghe mkasano wake gagaja.

⁴ Mtwanzi siyo mwene lukuli lwake, komu mkasano wake; vivo na heyo mbigalo siyo mwene lukuli lwake komu mwehe wake.

⁵ Sukumwiime, bali kwa kulagana kipigiti kidodo, giladi mwituze kwa kumtambikila Mulungu; imala mwigondanye kabili, giladi Mwenembago sikuyenghigwe ulegeho wa kuwageza, kilumbo hamdaha kwazaganya.

⁶ Gano nogalonga kamba vinigesa niye, si kamba kulava ndagizo.

⁷ Mmoyo novilonda, wanhu wose wawe kamba niye vinili; bali kila munhu kagwelelwa na Mulungu mhome yake; yuno vino, na yuja vino.

⁸ Waja wamhale hawanaowa, na wagane nowalongela, Vinoga wahakala kamba niye.

⁹ Komu kamba hawadaha kwazaganya, vinoga nawasole wehe; kilumbo kusola mwehe kuko kunogile sembuse kuhomwa na dongho.

¹⁰ Bali waja wamalile kowa (wene nhamanilo), nowalagiza, si nene komu Mndewa, Mwehe sikuweyase na mkasano wake!

¹¹ Mwehe yahawa weyasa na mkasano wake, yakale sikuyasoligwe na kamba sivivo, yagondanywe kabili na mkasano wake! na heyo mkasano sikuweyase na mwehe wake!

¹² Na waja wayagwe (wengile ndowa na wanhu wa kunze) niye nowalongela, – si longa da Mndewa, – Ndugu yahawa na mwehe yalemile nhamanilo, bali mwehe ija kolonda kukala nayo, sikuyamwase.

¹³ Na heyo mtwanzi yomtogola Mndewa yahawa na mkasano yolema nhamanilo, bali mkasano ija kolonda kukala nayo, sikuyamwase mkasano wake.

¹⁴ Kwa mzoko mkasano yuja hamtogole Mndewa, kongʼazwa na mwehe wake mwene nhamanilo; na mwehe yuja hamtogole Mndewa, kongʼazwa na mkasano wake mwene nhamanilo; kamba sivivo, wanenu wahawile hatali ya Mulungu, komu vino wangʼala, wabokelwa.

¹⁵ Komu yuja yalibule nhamanilo, mbigalo hebu mtwanzi, yahalonda kwiyasa, nayachole; yuja mkristo yasigale kabule kizuwililo kusola hebu kusoligwa, kilumbo Mulungu katukema muna ditindiwalo.

¹⁶ Kwa mzoko kovitangaze gweye mkasano, kamba kwiza komuhindula mwehe wako, yawe mkristo? Hebu kotangaze gweye mwehe mkristo, kamba kwiza komuhindula mkasano wako, yawe mkristo?

¹⁷ Avo nolonga, mkristo nayagoge uchozi, Mndewa viyamwinghile, na kila munhu nayagendese vivo kamba Mulungu viyamkemile; vivo vinilagiza muna gamadale gose.

¹⁸ Munhu yahakemigwa kumtogola Mndewa, na heyo kengila kumbi, sikuyaitende kamba hengile kumbi; na munhu yahakemigwa hengila kumbi, sikuyengile kumbi!

¹⁹ Kuja kwingila kumbi si mbuli, nako kuleka kwingila kumbi si mbuli, bali kugagoga malagizo ga Mulungu, iyo mbuli.

²⁰ Kila munhu viyali aho hayakemigwe, yakale vivo!

²¹ Kamba kukala mtumwa vuukemigwe mnhamanilo, sukuuwihilwe; bali uhadaha kwikombola, ikombole, na gweye uwe mulungwana!

²² Kilumbo yuja yakemigwe na Mndewa, yahali mtumwa, kaziga kukomboligwa na Mndewa; vivo na yuja mulungwana yakemigwe na Mndewa, kagalamka mtumwa wa Kristo.

²³ Mgulika hakulu; kabili sukumuwe watumwa wa wanhu!

²⁴ Mwandugu, munhu nayakale hakihanga cha Mulungu vivija vayali haja, hayakemigwe!

Wamhale wa kitwanzi wamnogeze Mndewa Yesu; Mbuli za uchumba na za mke filwa

²⁵ Mbuli ija ya wamhale wa ikitwanzi hawanasoligwa, sipatile lagizo ja Mndewa, komu nowalongela gaja gonigesa niye, ninghigwa bazi na Mndewa nhamanilwe.

²⁶ Vinikona kilumbo cha migaduko ino, vihanogile munhu yakale vivo viyali.

²⁷ Uhamala kwigondanya na pinga, sikuugese kumwasa; na kamba kwabule pinga, sikuuzahile kuowa!

²⁸ Bali uhaowa hutozile, na mhale wa ikitwanzi yahaowigwa hatozile; komu wene kuowa wogaya muna zinghuli zawo, na niye nonda kuwahonya gano.

²⁹ Ndugu zangu, nolonga vino, Mazuwa gasigale si bwando; avo kusongela vino, waja wene wehe wagambe kwali wabule; na hewo wene kulila wawe kamba hawalila!

³⁰ Na hewo wene kudengha wawe kamba hawadengha; na wene kugula vinhu wawe kamba wabule kinhu!

³¹ Na hewo wene kukapa ulumwengu uno, wawe kamba hawaukapa nghani; kilumbo mbuli za ulumwengu uno zobita.

³² Niye nolonda sukumgaye; kilumbo heyo yalibule mwehe, kogagaiya magweka ga Mndewa, yamnogeze Mndewa.

³³ Yuja mwene mwehe kogaiya mbuli za ulumwengu, giladi yamnogeze mwehe wake, avo kaigola magweka mabili.

³⁴ Gaja ga pinga na imhale wa ikitwanzi vivija: mtwanzi yalibule mkasano, hebu imhale wa ikitwanzi kogagaiya magweka ga Mndewa, giladi yangʼale mulukuli na mwiloho; bali yuja mwene mkasano kogaiya mbuli za ulumwengu, yamnogeze mkasano wake.

³⁵ Gano nogalonga nimtazeni, si kamba niwatege na luzabi, bali nolonda mwigange vinogile kwa kumsanghanila Mndewa, sukumulemelwe na vinhu viyagwe.

³⁶ Komu munhu yahona kamba hamtendela vinogile mhale wake wa kitwanzi yahaleka kumsola, na heyo kavika kikomo mmoyo wake, avo nayatende kamba viyolonda, nayamuowe; hatozile buli.

³⁷ Bali mhale yuja wa kimbigalo yahagangamala mmoyo mmwake, hananahizwa, kanazo mhiko za kuhuma manogelwa gake mwenyecho; munhu yali hivo kamba yahagelegeza kumwaliza mchumba wake, kotenda goya.

³⁸ Avo yuja mwene kuowa mchumba wake kotenda goya; na miyage yalemile kuowa, kobanza kutenda goya.

³⁹ Komu mtwanzi kanawo mwizilo wa siku zose ziyokala mkasano wake; bali mkasano yahadanganika, kadoholelwa kusoligwa na mbigalo yoyose iyolonda, komu kamba Mndewa Yesu viyolonda.

⁴⁰ Bali yahakala vivo viyali mke filwa, kamota vinikona niye; vyemela nogesa kamba na niye ninghigwa Loho ya Mulungu.