1 Wakorinto 6 - Lagano da Isambi

Wakristo wana mhiko kutagusa mbuli zili mgati mmwawo

¹ Che, munhu wa kumwenu yahawa na mbuli na miyage, kodahaze kumgala kwa watagusi hawamtangile Mulungu, yaleke kuigala mbuli yake kwa didale?

² Hammanyile kamba wanhu wa Mulungu iwo wonda wautaguse ulumwengu? ihawa ulumwengu wotagusigwa na mweye, che, hamgambile kutagusa mbuli zino ndodo?

³ Hebu hamvimanya kamba towatagusa malaika? Avo mbuli za muno muisi zotulemela vilihi!

⁴ Kabili muhalonda kwitagusa mbuli za muno muisi, vokuwaze msagula watagusi walibule nhogolwa mdidale!

⁵ Nogalonga gano, niwagele kinyala; che, kumwenu kuduhu hata yumwe mwene nzewele, yodaha kulamula wayage?

⁶ Habali mweye mwigelaga mkitala ndugu kwa ndugu, ilawabaho kumwawo waja walemile nhamanilo!

⁷ Mbuli hizo zose za kwigela mkitala mwemwe kwa mwemwe, iko kuswela mgangamalo! Vilihi vumlema kwimigwa chenu; vihanogile kamba mvumile kubokigwa mali genu!

⁸ Amweye wenyego moboka wanhu na kubazaza mali gawo; viyemela gano mowatendela ndugu zenu!

⁹ Hammanyile kamba wabananzi hondawauhale Undewa wa Mulungu? Sikumkongigwe; wagoni, watambikila vinyago, wafutuzi, wene kwiwasa, wahindula ngendelo;

¹⁰ Wabavi, wene ugila, walonda ngholwa, wene maligo na wabazazi, awo wose hondawauhale Undewa wa Mulungu.

¹¹ Vyemela kumwenu umwaka wakala wakuko wali hivo; bali msunhigwa, mngʼazulwa, mpetigwa mwihoko kwa ditwaga ja Mndewa Yesu Kristo na muna Iloho ya Mulungu wetu.

Nghuli zetu zigalamka vilungo vyake Kristo

¹² Kumwangu niye kuduhu kinhu chene mwizilo, komu si vyose vinogile; kumwangu niye kuduhu mwizilo wowose, komu chondakinihume, sikilonda mbe.

¹³ Chakuja cholondwa na inda, nayo inda yolondwa na chakuja; komu Mulungu kovimambukiza vyose vibili; bali lukuli si lwa ugoni, kilumbo igo mali ga Mndewa, na heyo Mndewa yuyo Mwene lukuli.

¹⁴ Kwa mzoko Mulungu kamzusa Mndewa, avo kotuzusa na tweye kwa mhiko zake.

¹⁵ Hamvitanga kamba nghuli zenu ivyo vilungo vya Kristo; che, nivisole vilungo vya Kristo, nivihindule vigalamke vya ugoni? Aka, sivivo!

¹⁶ Hamvitanga kamba mwene kwinanahila na mtwanzi mgoni kagalamka lukuli lumwe na heyo? kwa mzoko Jandiko dilonga, Awo wabili wokuwa lukuli lumwe.

¹⁷ Komu mwene kwinanahila na Mndewa kogalamka loho imwe hamonga na Heyo.

¹⁸ Ukimbileni ugoni! Ubananzi wowose, munhu uyobananga, wokala kunze kwa lukuli lwake, bali ugoni wotozela lukuli lwake mwenyecho.

¹⁹ Hamvitanga kamba nghuli zenu iyo ngʼanda ya Loho Yangʼalile yomkalilani? yuyo yumgwelelwe na Mulungu, avo mweye si mali genu wenyecho!

²⁰ Mgulika hakulu; kwa kilumbo hicho mtunizeni Mulungu mzinghuli zenu na mloho zenu, kwa mzoko zizo zake Mulungu.