1 Wakorinto 4 - Lagano da Isambi

Nyakadala za Kristo watamanilwa, wonekaga vipokozi

¹ Avo munhu nayatupete tweye, kamba watumwa wa Kristo na wateganya nyongʼonyo za Mulungu.

² Aho kabili wolondigwa waja wateganya woneke kamba watamanilwa.

³ Komu kumwangu niye si kinhu, nihataguswa na mweye hebu wayagwe wanhaguse kimunhu; na niye mwenyecho siitagusa.

⁴ Kilumbo nabule kihile kimanyile mmoyo, bali kwa hivyo sikomboke; yondayanhaguse yuyo Mndewa.

⁵ Kwa kilumbo hicho sukumtaguse mbuli yoyose siku zino, kikomo Mndewa vondayeze; na Heyo kolava gaja gafisigwe mdiziza, goneke hamulangaza, na Heyo yuyo yondayavumbule mbuli zili mmiyoyo; baho kila munhu vondayabokele nhogolwa yake kulawa kwa Mulungu.

⁶ Mwandugu, mbuli zino nizilonga, zigalamke mahala ga niye na Apolo kwa kilumbo chenu, giladi kumwetu tweye mwifunze, sukumwidundule kubanza aho handikigwe; na munhu sikuyaitopele yuno, kuno yomzela iyagwe!

⁷ Iyo yalihi yomgolani gweye na miyago? hebu choni kiuli nacho, chuulekile kugolelwa? avo kamba kubokela, kokigodaze kamba hugwelelwe?

⁸ Mweye mziga kwiguta, mgalamka wene mali bwando, mtawala tweye twahaduhu; ihoko vihanogile mtawale, giladi na tweye tutawale hamonga na mweye!

⁹ Nogesa kamba Mulungu katulava tweye watumigwa kukisogo nghani, kamba wanhu wobeta kukomigwa; kilumbo tugalamka lagusilo da imbago hameso ga malaika na ga wanhu.

¹⁰ Tweye twawabozi kwa kilumbo cha Kristo; komu mweye mwa wene nzewele mmwake Kristo; tweye tuboba, amweye mgangamala; mweye modumbigwa, komu tweye hatudumbigwa.

¹¹ Na dilelo vino tuna nzala na nghilu, twa ukulunge, totowigwa mikonde, kabili twamkuzulula.

¹² Togaya kusanghana kwa makono getu wenyego; tuhaligwa tweye towamoteza; tuhagelwa lusango, tweye tofunya umoyo.

¹³ Tuhavwizilwa, tweye towahembekeza; tutendigwa kamba unyolodo wa muisi, kamba vipokozi vya wanhu wose, na dilelo.

Paulo kaigamba kamba mlezi wa ididale

¹⁴ Sigandike gano niwagele kinyala, bali nowazuma kamba wanangu wanogele.

¹⁵ Viyemela munawo walangulizi wa mbuli za Kristo elfu kumi, komu mwabule tata bwando, kilumbo niye nene niwalelile kulawa kwa Kristo Yesu kwa nzila ya Usenga Unogile.

¹⁶ Kwa kilumbo hicho nowazuma, ngholeni niye!

¹⁷ Kileka nimtuma Timoteo kumwenu, yuyo mwanangu mnogelwa, mtamanilwa hameso ga Mndewa, na heyo kowakumbusa sanghano zangu vizigondanya na Kristo, na viniwalangukiza madale ga wakristo hanhu hose.

¹⁸ Komu kumwenu wayagwe wokitopa kamba hondanize kabili!

¹⁹ Kumbe nokwiza mbwisa kumwenu, Mndewa yahalonda; baho vondanivimanye wokitopela mhiko zilihi; si malonga gawo gayeka.

²⁰ Kwa mzoko Undewa wa Mulungu haukalaga muulonzi, bali ukalaga mmhiko.

²¹ Avo molonda choni; nize kumwenu na fimbo, hebu mwene unogelo na loho iholile?