1 Wakorinto 3 - Lagano da Isambi

Migongo ya kilukuli

¹ Mowandugu, na niye sividaha kulonga na mweye kamba mwa wanhu wa kiloho, bali kamba wene nghuli, kwa vija vumuli wana wadodo kumwake Kristo.

² Niwangʼweza matombo, siwadimile ugali, kilumbo hamnaudahile, vivo na dilelo hamnaudaha.

³ Muhali tanhu wanhu wa kilukuli; kilumbo uhawa kuko kumwenu kwiyonela migongo na udesi, che, hamuli wa lukuli, na kugoga uchozi wa kimunhu?

⁴ Kwa mzoko imonga yahalonga, Niye namunhu wa Paulo! na iyagwe, Niye namunhu wa Apolo, che, hamuli wanhu?

⁵ Apolo yuyo yalihi? Paulo yuyo yalihi? Iwo wasanghani wawalangukize mweye kumtamanila Mndewa, na kila imonga kamba Mndewa viyamgwelele.

⁶ Niye mhanda, Apolo kagelela mazi, bali Mulungu yuyo yoteze.

⁷ Avo mwene kuhanda siyo, hebu mgelela mazi siyo, bali Mulungu mwene koteza yuyo.

⁸ Munhu yuja yohanda, na yuja yogelela mazi, wagamba imwe, na hewo wopata kitumetume kila munhu cha kugaya kwake mwenyecho.

⁹ Kilumbo tweye tosanghana hamonga na Mulungu; mweye mwamgunda wake na zengo ja Mulungu.

¹⁰ Niye kwa vija vingwelelwe ugalu na Mulungu, nika lukwambaza kamba fundi mwene fiyuko za kuzenga; munhu iyagwe kozenga uchana mmwake, komu yateganye vija vondayazenge!

¹¹ Kwa mzoko kuduhu yadahile kwika lukwambaza luyagwe komu luluja, lumalile kwikigwa, alo lulo Yesu Kristo.

¹² Bali munhu yahazenga uchana mwa lukwambaza hilo kamba zahabu hebu feza hebu mabwe gana mali bwando, hebu mibiki hebu mijani hebu usoti –

¹³ sanghano ya kila munhu yolawilila chalinze; yolagilwa siku hiyo ya ikitala, kwa mzoko yogubuligwa kwa moto; uja moto (wa nhaguso) wolinga sanghano ya kila munhu viili.

¹⁴ Zengo ja munhu diyazengile uchana mwa nghwambaza, dihakala, kobokela miyawi.

¹⁵ Kamba zengo ja munhu dihabanangika, hondayapate kinhu, komu mwenyecho kokomboligwa, bali kamba kubita umoto.

Ngʼando ya nhamanilo; avo kwitopela wanhu viha

¹⁶ Hammanyile kamba mweye mwa ngʼanda ya Mulungu, na Loho ya Mulungu yamumo mgati yenu?

¹⁷ Munhu yahaibananga ngʼanda ya Mulungu, Mulungu kombananga na heyo, kwa mzoko ngʼanda ya Mulungu ingʼala, iyo mweye.

¹⁸ Munhu sikuyekonge; yahawa munhu kumwenu yokiwalanga kamba kana fiyuko za imbago ino, nayagalamke mbozi tanhu, giladi kwiza yakalagale mwihoko!

¹⁹ Kilumbo hiwo ubala wa ulumwengu uno uwo ubozi hameso ga Mulungu, kwa mzoko yandikigwa, Wakalagavu Mulungu kowanamasa muna uubala wawo wihile.

²⁰ Kabili, Mndewa kazitanga ngelegeza za wene ubala kamba zabule lutondo!

²¹ Avo munhu sikuyaitopele wanhu. Kilumbo gose igo genu:

²² yahawa Paulo hebu Apolo, yahawa Kefa hebu imbago, uhawa ugima hebu kifo, gahawa galibaho hebu gondagawe baho; gose igo genu!

²³ Komu mweye mwa wanhu wa Kristo, na Heyo Kristo yuyo wa Mulungu.