1 Wakorinto 2 - Lagano da Isambi

Fiyuko za kimunhu hazidaha nyongʼonyo za loho

¹ Mowandugu, vinizile kumwenu kuubwililisa usindi wa Mulungu, sizile kuwalongela ulonzi mtali wa nzewele bwando.

² Kwa mzoko sigesile nghungwe iyagwe kumwenu, komu Yesu Kristo na heyo kamba viyawambigwe mdibiki.

³ Na niye nghala kumwenu nibobile, kuno nigudema na bwembwe.

⁴ Kabili usindi wangu haukalile ugalu wa malonga gene mhiko za kuhuma, bali kuhuguza kwa Loho wa Mulungu yene mhiko.

⁵ Vivo mumtamanile Mndewa kwa kuhumwa na mhiko zake, si kwa kuhumwa na ubala wa kimunhu.

⁶ Viyemela gakuko ga fiyuko za ihoko; ago towalongela waja wene kugaduganya gose; bali fiyuko hizo hazilawa mulumwengu uno hebu kwa wakulu wa imbago ino wafaga.

⁷ Komu fiyuko zija zitulonga zizo za Mulungu zene nyongʼonyo zifisigwe; komu Mulungu kazika goya aho umwaka, ulumwengu haunaumbigwa tanhu, giladi tuibokele iyenzi yake.

⁸ Viyemela waja watawala wa imbago ino kuduhu yumwe yaitangile nghungwe ino, kilumbo kamba waitambule, hisambi wamuwambe mumsalaba Mndewa mwene iyenzi.

⁹ Komu kamba viyandikigwe, Siso hadilolile, na gutwi hadihulike, na muli umoyo wa munhu hadingile, digamba magweka gaja, Mulungu gayawatunduwilile waja womnogela.

¹⁰ Bali tweye Mulungu katugubulila aho hayatwinghile Loho yake; kilumbo Loho yowalanga magweka gose, na nghungwe za Mulungu.

¹¹ Kwa mzoko yalihi yamanyile mbuli za munhu komu loho yake ili mumo mmwake? Avo vivo mbuli za Mulungu kuduhu mwene kuzitanga komu Loho ya Mulungu.

¹² Na tweye hatugwelelwe loho ya imbago ino, bali tugolelwa loho ilawile kwa Mulungu, giladi mgatange gatugolelwe na Mulungu.

¹³ Higo gago gotulonga; hatulonga vitulangukizwe na ubala wa munhu, bali vitulangulizwe na Loho; avo mbuli za kiloho towadogolela waja wene Iloho.

¹⁴ Komu munhu yohulika manogelwa ga moyo wake, hagolelwa mbuli za Loho wa Mulungu; kwa mzoko kogagesa kamba ubozi, hadaha kugatanga, kilumbo gotambulwa kwa mhiko za Loho yeka.

¹⁵ Bali munhu yomtegeleza Loho wa Mulungu kolamula gose, vilema mwenyecho halamulwa na munhu.

¹⁶ Kwa mzoko, Yalihi yagatambule viyagesaga Mulungu Magana, yamulangukize? Bali tweye tunago magesa gake Kristo.