1 Wakorinto 16 - Lagano da Isambi

Msango wa kuwataza wakiwa wa Yerusalemu

¹ Mbuli ija ya msango wa kuwataza wakristo waja wali hiko Uyuda, nowapembela kamba viniwalagize wakristo wa Galatia, na mweye tendeni vivo!

² Siku ya ikilongozi ya juma, kumwenu kila munhu nayalimbike hamngwazo fungu ja pato jake, imala yagahanganye gose, kilumbo msango kabili sukuusonge, niye vondamvike.

³ Bali nihavika, waja wamsaguleni mweye, nowatuma hamonga na mtapa, waugale msango wenu Yerusalemu.

⁴ Komu vihawa bwando, vihanoga, na niye nochola hamonga nawo.

Miyanza yawo Paulo, Timoteo na Apolo

⁵ Bali tanhu novika kumwenu, nihamala kubita Makedonia.

⁶ Kwali kamba vihalumba, siku za ikihuhwe, nokala kumwenu, giladi munihilike hiko kunichola.

⁷ Kilumbo silonda mweye nimoneni lubito yeka, kamba Mndewa yahagesa.

⁸ Komu kuno Efeso nokukala kikomo cha sikunghulu ya Kubwagala Loho Ingʼalile (Pentekote).

⁹ Kwa mzoko mvugulilwa lwivi lukulu, kabili sanghano zibanza nghani, viyemela bwando wobamila.

¹⁰ Komu Timoteo yaheza kumwenu, teganyeni nayakale kumwenu halibule kidumbo, kilumbo na heyo kosanghana kazi za Mndewa kamba nene.

¹¹ Avo munhu sikuyamzele, komu mfungileni mwanza vinogile, giladi yambwelele kuno; kwa mzoko nombeta hamonga na ndugu zetu.

¹² Komu kwa mbuli za ndugu yetu Apolo mvimanye kamba nghala nimswagiza miyanza bwando, yeze kumwenu hamonga na wano ndugu, bali heyo halondile kwiza vino sambi; komu kokwiza haja vondayaupate ulegeho.

Ndamusilo zawo Stefana na Akila na wayagwe

¹³ Kaleni mangweda, mgangamale kwa kumtamanila Mulungu, mwime kimbigalo, muwe migalu!

¹⁴ Mbuli zenu zose zisanghaneni na unogelo!

¹⁵ Mowandugu, dinilonga ijo dino, muwatanga wanhu wa mngʼanda ya Stefana, kamba hewo wakala songelo da isi ya Ugriki (Akeya), na hewo waigela muna zisanghano za kuwatunduwila wanhu wa Mulungu.

¹⁶ Avo wategelezeni goya wanhu kamba hiwo, na waja wose wosanghana kazi na kugaduka, vuwali kamba wawo!

¹⁷ Na niye nidenghelela vuwezile kumwangu kina Stefana na Fortunato na Akaiko, kwa mzoko wanhunduwila nghani gaja ganiswelile kumwenu.

¹⁸ Kilumbo wanihoza loho yangu hamonga na loho zenu; avo watangeni nghani wanhu kamba awo!

¹⁹ Madale ga makanisa gali kuko kuno Asia, womulamusani; Akila na mkewe Priska womulamusani nghani hamonga na didale dili mngʼanda yawo, kwa kilumbo cha Mndewa.

²⁰ Na ndugu wose wamulamusani; ilamusegeni kwa mnonelo ungʼalile!

²¹ Ino iyo ndamuso yangu niye Paulo, noilemba kwa mkono wangu.

²² Munhu kamba hamnogele Mndewa, ayo nayabagulwe (yadumilizwe na Mulungu)! Mndewa kokwiza!

²³ Uholo wa Mndewa Yesu uwakalile mweye!

²⁴ Unogelo wangu ukale namweye mose, vutwiduganye kumwake Kristo Yesu. Amina.