1 Wakorinto 14 - Lagano da Isambi

Dale da wakristo dizengigwa kwa mhome za iloho; Ulonzi yungwa wa loho hautangika vinogile

¹ Ukoleni unogelo, kabili zizahileni nghani mhome za loho, gabanzile zose mdahe kufambula.

² Kilumbo munhu yuja mwene ulonzi yungwa wa Loho halonga na wanhu, komu kolonga na Mulungu, na wanhu wolemelwa kuutanga ulonzi wake, kilumbo kolonga magweka ga nyongʼonyo za mloho yake.

³ Bali heyo yodipeta Dilonga, kolonga na wanhu kuno yowagangamaza na kuwazuma na kuwahoza miyoyo.

⁴ Bali yuja mwene ulonzi yungwa wa Loho kokimemeza ija Iloho mwenyecho; ayuja mwene kufambula kodizenga didale.

⁵ Niye nomulondani mweye mose mulonge ulonzi yungwa wa Loho, komu kubita aho nolonda mfambule, kilumbo mfambula dilonga yuyo mkulu kubanza mwene ulonzi yungwa, vyemela ulonzi yungwa ilumba ufambulwe, giladi didale jose digangamazwe.

⁶ Mowandugu, kamba niheza kumwenu, nihalonga ulonzi yungwa, nowataza vilihi, kamba silongile namwe vivija kwa nzila ya lugubulo hebu fiyuko hebu kuzuma hebu kulangukiza?

⁷ Vogamba kamba vinhu vililaga viliyeka, vilibule ugima kamba nzumali hebu kingʼwengʼwe; kamba zihalava dizwi hadimanyika, haduhu munhu yondayalutange lwila lulihi lutowigwa.

⁸ Na mhalati kamba ihalava dizwi dilibule lutondo, yalihi yondayaike goya kuchola kuli inghondo?

⁹ Avo vivo na mweye kamba hamulavile mbuli za chalinze kwa lulimi, che, mbuli ija imulonga yotangikaze? Kilumbo mgalamka kamba wanhu wolonga na ubeho.

¹⁰ Vilema mulumwengu wamumo ulonzi bwando, bali kuduhu ulonzi ulibule mzoko.

¹¹ Avo niye nihaleka kuutangu uja ulonzi wa munhu yungwa, nogalamka mbozi kumwake, na heyo yolonga kogalamka mbozi kumwangu.

¹² Na mweye kwa vija vumkiyoha kugapata magolelo ga Loho, zahileni ija inghungwe yondaigangamaze didale, yenele kumwenu!

¹³ Na munhu yolonga ulonzi yungwa wa Loho, nayampule Mulungu kugwelelwa vivija fiyuko za kuufambula!

¹⁴ Kwa mzoko nihalonga ulonzi yungwa wa Loho, nomtambikila Mulungu mloho, bali ngelegeza zangu zamduhu.

¹⁵ Avo nhendeze? Notambika kwa ulonzi yungwa, kabili notambika hamonga na nzewele zangu. Nomulavila Mulungu lwila lwa ulonzi yungwa, kabili nomulavila lwila kwa nzewele zangu.

¹⁶ Kilumbo uhamtunila Mulungu kwa ulonzi yungwa, kamba kabaho munhu hautangile ulonzi wako, kodahaze kwidikila yalonge Amina? kwa mzoko hamanyile gaulongile.

¹⁷ Vyemela gweye mwenyego kumtambikila Mulungu goya, komu yuja iyagwe hatazigwe kinhu.

¹⁸ Nomtogola Mulungu kilumbo nolonga ulonzi yungwa wa Loho kubanza mweye mose;

¹⁹ komu muna gamadale vinoga kulonga mbuli nhano kwa fiyuke zangu giladi niwalangukize wayangu, sembuse kulonga mbuli elfu kumi kwa ulonzi yungwa hautangikaga.

Nhambiko ilumba kutendwa ugaluga; Ulongozi wa didale, watwanzi sikuwalabile

²⁰ Mowandugu zangu, sikumgelegeze kamba wana wadodo, bali mgambe wana wadodo muna zimbuli zihile; komu muna zifiyuko zenu mgangamale!

²¹ Yandikigwa muna Inzuma, Lukolo luno nolonga nawo kwa ulonzi yungwa na kwa milomo yungwa, vyemela hondawanihulike, vivo yolonga Mndewa.

²² Avo uja ulonzi yungwa kicho kilolomboto hondakiwakwege wamtamanile Mulungu, bali wakale vivo vuwali bule nhamanilo; komu mhome ya kufambula Dilonga uwo utango wa waja wondawamvumile Mulungu, giladi sikuwakale bule nhamanilo.

²³ Ihawa didale jose dihailundiza hamonga, na wose wahalonga ulonzi yungwa, kabili wahengila wanhu hawautangile ukristo, hebu walibule nhamanilo, che, hondawalonge kamba mweye muna kikwale?

²⁴ Komu ihawa wose wahapeta Longa da Mulungu, kabili yahengila munhu yalibule nhamanilo hebu hautangile ukristo, kolagusilwa na wose matozo gake, kotaguswa na gaja goyohulika.

²⁵ Na gaja gali mmoyo mmwake, gogubulwa, na heyo kogwa kingubanguba, kuno yomtambikila Mulungu na kuvumila kamba Mulungu kahamonga namwe mwihoko.

²⁶ Mowandugu, tutende vilihi? muhailundiza hamonga, ayuno kolava lwila, ayuno kolava langukizo, yuno lugubulo, yuno ulonzi yungwa, yuno fambulilo za ulonzi; magweka gose gasanghanwe kwa giladi ja kudizenga didale!

²⁷ Kamba ulonzi yungwa uhalonda kulongwa, walonge wabili wadatu, sukuwabanze; kabili walonge yumwe yumwe, kuno mkalimani yofambula.

²⁸ Kamba mkalimani kahaduhu, wanyamale mdidale; vinoga walonge wenyego hakihanga cha Mulungu.

²⁹ Wahawa baho watulandagu, walonge wabili hebu wadatu, na waja wasigale wagasindile galongigwe.

³⁰ Ihawa munhu iyagwe yakalile behi yahagubulilwa mbuli, yuja yalongole nayanyamale.

³¹ Kilumbo mweye mose modaha kupeta Longa yumwe yumwe, giladi wose wailangulize na kuzumika.

³² Nazo loho za watulandagu zohulika watulandagu.

³³ Kwa mzoko Mulungu hanogelwa na mkukumkuku, bali kalondaga tindiwalo. Kamba vululi luto lwa makanisa gose,

³⁴ kamba muhailundiza kwa kilumbo cha didale, watwanzi nawanyamale; kwa mzoko havilumbile kulabila, bali waituze kamba vija viilonga Inzuma, sukuwagalamke walamuzi!

³⁵ Komu wahalonda kuzitanga mbuli zozose, nawauze wakasano zawo mmangʼanda gawo! Kwa mzoko havinogile mtwanzi kulabila hali mtinghanilo (wa ulongozi) wa didale.

³⁶ Che, Longa da Mulungu dilawa kumwenu? Hebu dimvikilani mweye mwiyeka?

³⁷ Munhu yahaigamba kamba mtulandagu hebu wa kiloho, nayagamanye ago gonimwandikilani kamba dijo lagizo ja Mndewa!

³⁸ Komu munhu kamba havumile, sikuyavumilwe! (hebu: Mulungu hondayamvumile.)

³⁹ Avo mwandugu zangu, gangamaleni nghani kudipeta Dilonga; sukumgomese ulonzi yungwa wa Loho;

⁴⁰ komu magweka gose gasanghanwe vinogile kwa ugaluga!