1 Wakorinto 13 - Lagano da Isambi

Nogelo dijo golelo kulu, dihumaga gose

¹ Viyemela nanilonge ulonzi wa kimunhu na wa kimalaika, kamba nihawa bule unogelo, nogamba mpatu ulila hebu nyangili yene mizangi.

² Viyemela nigambe mtulandagu, nigatange mahala gose na kufambula gose na kuwabanza wose kwa kumtamanila Mulungu, nidahe kuhamiza vigongo; nihawa bule unogelo, nogamba niye si kinhu.

³ Viyemela naniwagolele iwakiwa mali gangu gose, nilulave na lukuli lwangu lusakale hamoto; kamba nihawa bule unogelo, nabule cha kupata.

⁴ Unogelo uwo ugelaga mwazaganyo na uholo; unogelo haugelaga migongo; unogelo haugelaga kwidundula hebu matopa.

⁵ Haubwelaga bule kidumbo, hauzahilaga mbuli zake wenyecho; haugelaga lusango, haupetaga gehile.

⁶ Haudenghelelaga uponela, komu udenghelelaga ihoko.

⁷ Unogelo upapaga gose, uvumilaga gose, utamanilaga gose, wazaganyaga gose.

⁸ Unogelo hauzigaga mazuwa gose; kamba uhawa baho utulandagu, oziga; kamba zihawa baho mhome za kulava ulonzi, zomala; kamba zihawa baho fiyuko za nyongʼonyo, kwiza zobita.

⁹ Kilumbo tugamanya madodo, kabili tugafambula madodo.

¹⁰ Komu dija diiduganye vondadize, gaja gamadodo gobanangika.

¹¹ Vinghalile mwana mdodo, nikala nilonga vya uwana udodo; nivimanya vya uwana udodo, nghala nigesa vya uwana udodo; lulawile haja hanghalile munhu mgima, nimana kuzisemwa mbuli za udodo.

¹² Kwa mzoko vino sambi tolola kwa kiwowo, igambile nyongʼonyo kamba mahala; komu kwiza tolola meso kwa meso. Vino sambi madodo gatutangile; kwiza novitanga nghani, kamba na niye vinitangika nghani na Mulungu.

¹³ Avo vino sambi gondagakale zizo nhamanilo na kibetelo na nogelo; komu kulu dibanzile gose dijo nogelo.