1 Wakorinto 12 - Lagano da Isambi

Vigolelo vya iloho vigelaga umwe wa kiloho

¹ Mowandugu zangu, nolonda mgamanye goya magweka ga wanhu waja wolongozwa na Loho.

² Na mweye mvitanga, vumkalile hamnamtanga Mulungu, mkala muhohotolwa na vinyago havilongaga, kamba vumsoligwe.

³ Kwa kilumbo hicho nompetelani kamba, Haduhu mwene Loho ya Mulungu yodaha kulonga, Yesu kalapizwa! kabili haduhu yodaha kulonga, Yesu yuyo Mndewa! kamba yahawa bule Loho Yangʼalile.

⁴ Vyemela kwabaho kwibanza muna vigolelo, bali Loho yuyo yuyuja yumwe.

⁵ Kabili kwabaho kwibanza muna kusanghanika, bali Mndewa yuyo yuyuja yumwe.

⁶ Vivija kwabaho kwibanza muna zimhiko, komu Mulungu yogela mhiko, kuno yosanghana muna iwanhu na vinhu vyose, yuyo yumwe. –

⁷ Komu kila munhu kogolelwa lugubulo lwa Loho, giladi waitaze wose.

⁸ Kwa mzoko munhu imonga kogolelwa na Loho gweka da nghungwe; na iyagwe kogolelwa gweka da fiyuko, kamba viyolonda Loho yuyuja.

⁹ Iyagwe, nhamanilo muna Iloho yuyuja, iyagwe, mhiko za kuhonya wanhu muna Iloho yuyuja yumwe.

¹⁰ Na iyagwe mhiko za kusanghana vilolomboto, iyagwe utulandagu; iyagwe, yadahe kubagula vigolelo vya Loho na vija vya utungulu; iyagwe, ulonzi yungwa wa Loho uno na uno; iyagwe, kufambula ulonzi yungwa hiwo.

¹¹ Sanghano hizo zose kozitenda Loho yuyuja imonga, yomgolela kila munhu yaiyeka kamba viyolonda. Wasanghani wa didale wagalagwa na Yesu

Hala ja lukuli na vilungo vyake;

¹² Kilumbo kamba vija lukuli, vilema luna vilungo bwando, vululi lumwe, na vilungo vyose vya lukuli, vyemela bwando, lulo lukuli lumwe, avo vivo Kristo.

¹³ Kwa mzoko tweye tose tubatizwa na Loho yumwe, tugalamka lukuli lumwe; kamba tuhawa Wayuda hebu Wagriki, tuhawa watumwa hebu walungwana, tweye tose tungʼwezwa Loho yumwe.

¹⁴ Kilumbo lukuli si kilungo kimwe, bali vilungo bwando.

¹⁵ Mgulu uhalonga, Nili sili mkono, avo niye sili kilungo cha lukuli; che, kwa kilumbo hicho huli kilungo cha lukuli?

¹⁶ Hebu gutwi dihalonga, Niye sili siso, avo niye sili kilungo cha lukuli; che, kwa kilumbo hicho huli kilungo cha lukuli?

¹⁷ Kamba lukuli lose lugalamka siso, kwa kwahi kuhulika? Kamba lukuli lose lugalamka gutwi, kwa kwahi kunusiza?

¹⁸ Komu Mulungu kavigela vilungo kila kimonga muna ulukuli kamba viyalondile.

¹⁹ Vyemela kamba vyose vigalamke kilungo kimwe, lukuli luhawile kwahi?

²⁰ Avo vilungo ivo bwando, komu lukuli lulo lumwe.

²¹ Na siso hadidaha kuulongela mkono, Gweye sikulonda; hebu kabili ditwi hadidaha kugalongela magulu, Mweye simulondani!

²² Komu vija vilungo vya lukuli, vigesagwa kamba vinyeka nghani, vivo vilondwa nghani.

²³ Na vija vilungo vya mulukuli, vigesagwa kamba vyabule nhunizo, vilungo vija toviteganya nghani; na vilungo vyetu vilibule mnogo, tweye tovigubika vinogile.

²⁴ Kilumbo vija vilungo vyetu vinogile hameso getu, havilonda kuhambigwa, komu Mulungu kaluduganyiza lukuli na kukigolela nhogolwa kija kilungo kihunguke,

²⁵ giladi sukukulawilile muhasanyo mulukuli, bali vilungo viteganye kila kilungo na kiyagwe.

²⁶ Avo kilungo kimwe kihatenheleka, vilungo vyose vitenheleka; na kilungo kimonga kihatunilwa, vilungo vyose vokimozamoza hamonga na kija.

²⁷ Avo mweye mgalamka lukuli lwa Kristo, kila kilungo chokitaza na kiyagwe.

²⁸ Na Mulungu, kwa kilumbo cha didale da Yesu Kristo, kaweka lwa ichanduso watumigwa, lwekabili watulandagu, lwekadatu walangukizi, imalabaho mhiko za vilolomboto, imalabaho vigolelo vya kuhonya vyugulo, kwitaza, kulongoza, ulonzi yungwa uno na uno.

²⁹ Che, avo wose hiwo watumigwa? Wose wolava vilolomboto?

³⁰ Wose hiwo wene mhome za kuhonya watamu? wose wolonga ulonzi yungwa? wose woufambula ulonzi yungwa?

³¹ Gangamaleni giladi magweka gaja mgolelwe gabanze kunoga! Na niye nowalagila nzila inogile kubanza zose.