1 Wakorinto 10 - Lagano da Isambi

Magweka ga Israeli kuluwala

¹ Mowandugu zangu, nolonda mvitange goya kamba tata zetu wose wachola wagubikwe na wingu, na hewo wose wabita mbahali.

² Na vija vuwabitile mdiwingu na mbahali, wose wabatizwa mditwaga ja Mose.

³ Kabili wose wakala woja chakuja kimonga kikija cha kiloho;

⁴ wangʼwa kingʼwelo kimonga kikija cha kiloho, kilumbo wangʼwa mazi gaja galawile muna idibwe ja kiloho diilongoze nawo, na dibwe dija yuyo Kristo.

⁵ Bali kumwawo bwando Mulungu hanogelwe nawo, kileka wangamila kuluwala.

⁶ Magweka higo gavikizwa giladi twifunze, na tweye sukututende dongho ihile kamba waja vuwakalile na dongho.

⁷ Hebu sikututambikile vinyago, kamba waja wayagwe vuwatendile, kamba viyandikigwe, Wanhu wakala hasi giladi waje wangʼwe, imala wenuka wavina.

⁸ Vivo sikututende ugoni kamba waja wayagwe vuwatendile, wadanganika zuwa dimwe wanhu milongo mibili na wadatu elfu (23,000).

⁹ Hebu sukutumgeze Mndewa kamba waja wayagwe vuwamgezile, walumigwa na mizoka.

¹⁰ Hebu sukumtwanganike kamba waja wayagwe vuwatwanganike, wangamizwa na malaika wa kifo.

¹¹ Higo gose gawapatile waja, gagamba kamba mahala, gandikigwa kutuzuma tweye tuvikile hana mazuwa ga ikimambukizo.

¹² Avo heyo yokigesa kamba kagangamala, nayateganye sikuyagwe!

¹³ Mweye hamunagezigwa tanhu mbuli zibanzile mhiko za wanhu; komu Mulungu yuyo mtamanilwa hondayavumile, mweye mgezigwa kubita vumdaha, bali iho vondamgezigwe kowenghani mhiko za kwazaganya, giladi muhonyokwe.

Teganyeni hanganyo dihile mzimbuli za nhambiko

¹⁴ Avo mbwiga zangu, ikimbileni nhambiko ya vinyago!

¹⁵ Nolonga namwe kamba wanhu wene nzewele. Lamuleni wenyecho gano ganilonga!

¹⁶ Kingʼwelo kino cha inhogolwa kitumoteza, hakitugolela hanganyizo da mulopa wake Kristo? Na umgate utumegaga, hautugolela hanganyizo da lukuli lwake Kristo?

¹⁷ Kwa mzoko mgate uwo umwe, na tweye tuli bwando twa lukuli lumwe, kilumbo tweye tose tugolelwa mgate uja umwe.

¹⁸ Waloleni Waisraeli vuwoikola inzuma: waja wajaga nyama za nhambiko, che wamduhu muna dihanganyizo da nhambiko?

¹⁹ Ago golagila choni? mmanye gohuguza kamba inyama ya nhambiko igamba na mhiko? hebu kija ikinyago kigambe na mhiko?

²⁰ Aka sivivo; komu vinhu vija vuwalavaga nhosa, walavaga kwa vinyamkela, hawamulavilaga Mulungu; na niye silonda mweye mgakole magweka ga vinyamkela.

²¹ Hamdaha kungʼwa kikonha cha Mndewa, na kikonha cha vinyamkela; hamdaha kwigondanya hali ulupango lwa Mndewa na lwa vinyamkela.

²² Hebu tomgela Mndewa migongo? Che, tunazo mhiko kubanza Heyo?

Sikuuwahonze waja wali kunze, teganya nghwalo

²³ Wayagwe wahalonga, Tukomboligwe, hatugogigwa na nzuma yoyose! niye nolonga, Wona, komu si vyose vilumbile mkuja; kuduhu chochose chene mwizilo; komu si vyose vizengaga mloho.

²⁴ Munhu sikuyazahile pato jake mwenyecho, bali yazahile na ga miyage!

²⁵ Vyose vigulizagwa hagulilo diyeni, sukumuuze kuvilawile, giladi sukumsinhe mmoyo!

²⁶ Kilumbo mbago ino iyo ya Magana na vyose vilimumo.

²⁷ Ihawa munhu hamtangile Mndewa yahamgonekani, na mweye muhalonda kuchola, vyose vonda mtindimikilwe, diyeni halibule kuuzagiza kuvilawa, giladi miyoyo sikuisinhe!

²⁸ Komu munhu yahawalongela, Ino iyo nyama ya nhambiko; aho sukumuje, kilumbo heyo kamulongelani, kabili kwa giladi na miyoyo ija inyekile sikuipotwe!

²⁹ Silonga moyo wako wene fiyuko, bali uja wa munhu iyagwe; kwa mzoko vilihi ulungwana wangu utaguswe na moyo wa munhu iyagwe?

³⁰ Hebu nihavija vinhu vya kugolelwa, nonangwa vilihi kwa vija vinhu, nivibokele kwa kumulavila Mulungu nhogo?

³¹ Avo kamba muhaja hebu muhangʼwa hebu muhasanghana jojose diyagwe, gatendeni gose, giladi gamtunile Mulungu!

³² Iteganyeni sukumuwahonze Wayuda hebu Wagriki hebu dale ja Mulungu!

³³ Vivija kamba na niye viniwanogeza wanhu wose muna gamagweka gose, vyemela sizahila pato jangu mwenyecho, bali pato jawo wali bwando, giladi wakomboligwe.