1 Wakorinto 1 - Lagano da Isambi

Hongeleni wakristo mwigondanye na Yesu

¹ Niye Paulo nghemigwa ngalamke mtumigwa wa Kristo Yesu kwa manogelwa ga Mulungu, hamonga na ndugu Sostene,

² towandikilani mweye wasagulwe wa Mulungu muli hiko Korinto; na mweye mngʼazulwa na Kristo Yesu, mkemigwa mngʼala hamonga na waja wose woditogola twaga ja Mndewa wetu Yesu Kristo kokose, hiko kumwawo na kuno kumwetu.

³ Uholo umkalileni na tindiwalo kulawa kwa Mulungu Tata wetu na kwa Mndewa Yesu Kristo!

⁴ Nomuhongeza Mulungu mazuwa gose kwa unovu wake uyawenghile mweye mmwake Kristo Yesu.

⁵ Kilumbo kwa kukala nayo, vivo vumgwelelwa zose zili muna gamalangukizo na ukalagavu wose –

⁶ na usindi wa Kristo wopata mhiko kumwenu.

⁷ Avo kuduhu golelo jonda mwimigwe, muhambeta Mndewa wetu Yesu Kristo vonda yalawilile kimwagaiye.

⁸ Heyo yuyo yondayawagele mhiko kuvikila ikimambukizo, giladi moneke siku hiyo ya Mndewa wetu Yesu Kristo mkala bule kinghwaso.

⁹ Na Mulungu yuyo mtamanilwa, yawakemile mweye mwigondanye na Mwanage Yesu Kristo Mndewa wetu.

Udesi uwingile muna ididale

¹⁰ Mowandugu, nowazuma kwa twaga ja Mndewa wetu Yesu Kristo, mulonge mose mbuli imwe, sukumwigole mwemwe kwa mwemwe, bali muwalange longa dimwe!

¹¹ Ndugu zangu, nghala nongelwe na waja wa ngʼanda ya Kloe, kamba kumwenu kuna udesi.

¹² Nolonga dija dimhulike kumwenu; yuno kolonga, Niye namunhu wa Paulo! iyagwe, Niye namunhu wa Apolo! iyagwe, Niye namunhu wa Kefa! iyagwe, Niye namunhu wa Kristo!

¹³ Che, Kristo kabili kaigola? hebu Paulo kawambigwa mdibiki kwa kilumbo chenu? hebu msingulwa kwa twaga ja Paulo?

¹⁴ Nomuhongeza Mulungu, sibatize munhu kumwenu komu Krispo na Gayo.

¹⁵ Kwa mzoko munhu sikuyalonge, Mbatizigwa kwa twaga ja Paulo.

¹⁶ Na igambe niwabatiza wawo wa mngʼanda ya Stefana; vilema sigesa kamba kabaho iyagwe imbatize.

¹⁷ Kilumbo Kristo hanhumile kubatiza, komu kanhuma kuupeta Usenga Unogile; si kwa malonga ga kunogeza wanhu, giladi msalaba wa Kristo sikuunengulwe.

Ubala okwikwala mumsalaba na muubozi wa Kimulungu

¹⁸ Kilumbo mbuli ya msalaba iyo ya ubozi kumwawo wene kwangamila, bali kumwetu tweye tukomboligwe, iyo mhiko ya Mulungu.

¹⁹ Kwa mzoko yandikigwa, Nozibananga nzewele za wene nzewele, na nghungwe za wene nghungwe nozilema.

²⁰ Kakwahi mkalagavu? Wakulihi wene zifiyuko? Kakwahi mwene bamila wa siku zino? Che, Mulungu hawehule wabala wa imbago ino?

²¹ Kilumbo ubala wa ulumwengu uno haumtangiie Mulungu, kamba fiyuko za Kimulungu vizili za ihoko, avo Mulungu kanogelwa kuwakombola wenekumtamanila kwa usenga ukoneka kamba ubozi.

²² Kwa mzoko Wayuda wolonda vilolomboto, na Wagriki wozahila fiyuko.

²³ Bali tweye tombwililisa Kristo viyawambigwe mumsalaba; baho Wayuda howokikwalila, na Wagriki wovona ubozi.

²⁴ Komu waja wakemigwe Wayuda na Wagriki, kumwawo tompetaga Kristo zizo mhiko za Mulungu, kabili zizo fiyuko za Mulungu.

²⁵ Kilumbo ubozi wa Kimulungu zizo fiyuko za ihoko kubanza fiyuko za wanhu, na udonhi wa Kimulungu zizo mhiko kubanza mhiko za wanhu.

²⁶ Mowandugu, loleni vumkemigwe na Mulungu; kuduhu bwando wene fiyuko za kimunhu, kuduhu bwando wene mhiko, kuduhu bwando wene kudumbigwa.

²⁷ Bali wali na ubozi hameso ga ulumwengu uno, iwo Mulungu wayasagule, giladi yawanange wene fiyuko; kabili waja wanyekile mulumwengu uno, iwo Mulungu wayasagule, giladi yawanange wene mhiko.

²⁸ Avo vivo wali wakiwa mulumwengu uno na wobezigwa, iwo Mulungu wayasagule, na waja walekigwe kugesigwa kamba kinhu, giladi yawahize waja wotunilwa kamba kinhu.

²⁹ Kwa mzoko hakihanga cha Mulungu munhu sikuyaitope!

³⁰ Kumwake Heyo kuko mulawile na mweye, muli mumo mmwake Kristo Yesu; yuno yuyo yagalamke fiyuko zetu za Kimulungu, na mgoloko wetu, na mngʼazulo wetu, na nghombolwa yetu.

³¹ Avo kamba viyandikigwe, Mwene kwitopa, nayaitopele gaja gayatendile Mndewa!