1 Timoteo 6 - Lagano da Isambi

Nyakadala wakale na ikidumbo

¹ Wanahina waja wafungigwe na kwangwa ja utumwa, iwandama kuwagesa bwana zawo muli ikidumbo chose, giladi twaga da Mulungu sukudiligwe, hebu malangulizo getu.

² Komu wene gamabwana wamvumile Mndewa, sikuwawazele kilumbo wagalamka ndugu, komu wawatumikile kubanza umwaka, kwa mzoko wamtogole Mndewa na kuhanganikila gweka da kwinogela, kabili na hewo wolonda kwibokeza mzisanghano zinogile. Ago langukiza na kuwazuma.

Kugesa mhiya dijo sina da wiho wose

³ Munhu wowose yolangukiza viyagwe, hagagoga malonga gene ugima ga Mndewa wetu Yesu Kristo hebu hakoleleza nhamanilo yetu, heyo kaidundula,

⁴ hamanyile kinhu, komu kolumwa utamu wa kuuzauza mbuli, na bamila da ulonzi, viyemela mumo mlawaga migongo, magomba, maligo, ngelegeza zihile;

⁵ na ndwagi za waja wapokile nzewele zawo, wolema ihoko, kuno wowalanga kamba inhamanilo iyo nzila ya kwizolela mhiya.

⁶ Ihoko nhamanilo uwo usumi mkulu, ihawa munhu kakolela gaja goyopata.

⁷ Kwa mzoko tweye hatugalile kinhu mmbago ino, kabili haduhu kinhu chonda tulawe nacho.

⁸ Avo kamba tuhenela chakuja na cha kuvala, natulonge tukolela.

⁹ Kilumbo waja walondaga mhiya bwando, wagwaga hana ukugezwa, wonamata na dongho bwando zilibule lutondo, zobananga wanhu, zowadidimiza muli ukwangamila, imalabaho wokola.

¹⁰ Kilumbo kugesa mhiya dijo sina da wiho wose; wayagwe wazizahila, waga, hawadahile kabili kumtogola Mulungu, walumila hakulu.

Nghondo ya nhamanilo; kukapa mali vinogile

¹¹ Komu gweye munhu wa Mulungu, ago ugakimbile! Uwinze ga ihoko, umdumbe Mulungu, umtamanile na kumnogela, kuno ufunya umoyo na kuhola!

¹² Uhome goya ija inghondo ya inhamanilo, igoge nzila ya upile uja wa idigunge uukemelwe; na gweye kuditogola mweneycho lagano dija dinogile hakihanga cha wasindi bwando.

¹³ Nokulagiza hameso ga Mulungu yovigwelela upile vinhu vyose, na hakihanga cha Kristo Yesu yalavile usindi unogile kumwake Pontio Pilato,

¹⁴ ugateganye gaulagizwe, sukugageligwe mimoli-mimoli hebu ulemavu, kuvikila aho Mndewa wetu Yesu Kristo vondayeze!

¹⁵ Heyo, kikomo chake kihavika, kolavilizwa kumwetu na Mulungu Mwene kutogolwa yaiyeka, Mtawala wa watawala, na Mndewa wa wandewa;

¹⁶ heyo yaiyeka yuyo hafaga, kakalaga mmulangaza hauvikagwa na munhu; kuduhu munhu yamonile, hebu kuduhu munhu yodaha kumulola; heyo zomgamba nhunizo zose na mhiko za idigunge, Amina.

¹⁷ Walagize waja wene gamali bwando muno mulumwengu, sukuwaitope hebu kuzitamanila mhiya, kwa mzoko ziyangayukaga; bali wamtamanile Mulungu yatwinghaga vinhu vyose kwa ubwando tuvikape.

¹⁸ Walongele walundize gamali ga ihoko kwa uchozi unogile, wabasilize kusanghana zinogile, kuno wogolela wayawo igawo na kuhanganikila hamonga nawo.

¹⁹ Avo wogona mabikilo gonda gagalamke siga inogile kwa mazuwa gondageze ga kuubokela ugima wa ihoko.

²⁰ Gweye Timoteo, gateganye gaugwelelwe kamba babulamana, winege na ulonzi ulibule mzoko hebu nhamanilo, na bamila dija da mbuli zikemagwa “fiyuko”, kumbe zizo fiyuko za uvwizi!

²¹ Wayagwe wazivumila hizo, waileka inhamanilo. Uholo umkalileni mweye!