1 Timoteo 5 - Lagano da Isambi

Wagane senhambo mdidale vuwali; Wagane wene nhogolwa, na vuwali wamhale

¹ Mvyele sikumkomhokele, komu umzume kamba tata; na wasongolo kamba ndugu!

² Watwanzi wavyele kamba mama; watwanzi wamhale kamba lumbu wa kitwanzi, kwa kidumbo chose!

³ Wagane wagambile wagane senhambo, awo na watazigwe.

⁴ Komu mgane kamba yahawa na wana hebu wazukulu, iwandama kuifunza tanhu wamdumbe Mulungu muna zingʼanda zawo, walihile wavyele zawo nhogo!

⁵ Bali mgane yagambile mgane senhambo iyo yuyo yalibule munhu wa kukala nayo, kuno yomtamanila Mulungu, yonanahila kumpula na kumtambikila imisi na ikilo.

⁶ Komu yuja halekaga dongho zake, ayo kadanganika yahali mgima.

⁷ Higo uwalagize giladi wakale walibule nghwalo!

⁸ Kilumbo munhu hatunzaga wanhu wa lukolo lwake hebu wali mngʼanda yake, kailema nhamanilo, kabananga kubanza waja hawamtogole Mulungu.

⁹ Mtwanzi mgane yagambile kwandikwa ugane iyo yuja yavikile milongo sita, kamba yakalile na mkasano imwe.

¹⁰ Kabili yasindilwe kamba sanghano zake zikala zinogile, kamba katunza wana hebu kugomela wanhu, kawasanghanila wanahina hebu kutaza walumile, hebu kwiyoha kutenda gogose ganogile.

¹¹ Komu waja wagane hawanavika milongo ija sita, walekwe kwandikwa, kilumbo awo wahengilwa na dongho za kusoligwa na mbigalo, wosonga kuileka na Kristo,

¹² woigela mnhaguso kamba waileka inhamanilo yawo ya ichanduso.

¹³ Ibanzile, wozowela kuwa wakoka, wozunguluka-zunguluka ngʼanda kwa ngʼanda; kabili si wakoka yeka, bali wagalamka wafiyalala wonyalukila wayagwe, wolonga gali bule lutondo.

¹⁴ Avo nolonda waja wagane wamhale wasoligwe, walele wana, wateganye magweka ga ngʼanda zawo, sukuwamwinghe imndumu ulegeho.

¹⁵ Kilumbo wayagwe wamala kuhinduka, womuwinza Mwenembago.

¹⁶ Komu mtwanzi mwene kumtamanila Mulungu yahawa na wagane mngʼanda yake, nayawatunze giladi dale da wanahina sikudilemelwe, bali waja watazwe wagambile wagane senhambo.

Kukagula vilongozi wa didale

¹⁷ Wavyele wa didale wolongoza vinogile, wenghigwe nhogolwa igambile miyanza mibili; ibanzile waja woigaza kudipeta dilonga na kulanguliza.

¹⁸ Kilumbo Jandiko jolonga, Ngʼombe yohugusa muhunga, sukuumdaze mulomo; kabili, Msanghani kandakanwa na kitumetume chake.

¹⁹ Mvyele wa didale yahadununzwa, sikuuvumile komu wawe baho wanhu wabili wadatu womsindila.

²⁰ Waja wogendelela kutoza, wazume hameso gawo wose, giladi na waja wayagwe wengilwe na kidumbo.

²¹ Nokulagiza hakihanga cha Mulungu na Kristo Yesu na malaika wasaguligwe, ugagoge malagizo gano hali bule mbagu hebu kunogeza munhu, muna gamagweka gose gousanghana!

²² Sukuumgelekele munhu makono chambwisa, hebu kuitaza na matozo ga wayagwe; witeganye mwenyecho ungʼazuke!

²³ Lulawile sambi sikuungʼwe mazi gayeka, komu ungʼwe vigimbi vidodo kilumbo cha inda yako viilumaga baho baho!

²⁴ Matozo ga wanhu wayagwe gonekaga chalinze, gowalongola kuwagala hana ikitala; bali wayagwe matozo gawo galawilaga kuchugu chawo.

²⁵ Avo vivo na zija sanghana zinogile, ziyagwe zokoneka chalinze, na zija ziyagwe hazonekaga, hazidahika kufisigwa.