1 Timoteo 4 - Lagano da Isambi

Viumbigwe vingʼazigwa kwa Longa da Mulungu; Iteganye wihonye mwenyego na waja wokuhulika

¹ Komu Loho yolonga kibunubunu, siku za ikimambukizo wolawilila wanhu wondawaleke kumtamanila Mulungu, wakoleleze loho zihohotoke, na magweka ga mizuka.

² Wagalamka wazenzeleganyi walongaga utungulu, wasomigwa moto, wageligwa utango mmiyoyo yawo.

³ Kuno wogomesa wanhu sukuwasole pinga, kabili wolagiza kugoga miko ya vyakuja, viyemela Mulungu kaviumba, vidigwe na waja womtamanila na kutanga ga ihoko, wamulavile nhogo Heyo.

⁴ Kwa mzoko vinhu viumbigwe na Mulungu, vyose vinoga, havilemagwa kamba vihadigwa kwa kulava nhogo.

⁵ Kilumbo vingʼazigwa kwa Longa da Mulungu na kwa nhambiko.

⁶ Avo uhawalanguliza wanahina mbuli hizo, kokuwa msanghani yanogile hameso ga Kristo Yesu, kwiza kozowela mbuli za inhamanilo na nghungwe zinogile zija ziukoleleza.

⁷ Komu simo za kivyele zija zilibule lutondo uzileme; wambilila kumdumba Mulungu!

⁸ Kilumbo magweka ga kulugongomanya lukuli ago gatazaga hadodo, bali gaja ga kuigongomanya iloho, imdumbe Mulungu, ago gatazaga hakulu kwa mbuli zose, gana kilaga cha ugima wa dilelo na uja ulibule kizigililo.

⁹ Uno uwo ulonzi wa ihoko, ugambile kuvumilwa na wose.

¹⁰ Kwa giladi dino tokiigaza na kwigangaliza, kilumbo tomtamanila Mulungu Mwene upile, Muhonya wa wanhu wose, vyemela waja wamtogole.

¹¹ Magweka higo uwalagize na kuzuma!

¹² Munhu wowose segeyakuzele kwa kilumbo uhali msongolo, komu ugalamke utango kwa wanahina, muna ukulonga na muna uchozi, muna unogelo na nhamanilo na mngʼazuko.

¹³ Kikomo vondanize, gangamiza nghani kuwasomela na kuwazuma!

¹⁴ Sukuuisemwe kudigoga golelo dija da Loho dikigwe kumwako, duugolelwe haja, wavyele vuwakugelekele makono, walava ndagu!

¹⁵ Magweka ago gagelegeza, wiyohe kugatenda, giladi wose wakutange kamba kukula goya!

¹⁶ Iteganye gweye mwenyecho na malangukizo gako, ugananahile; kilumbo uhatenda hivo, kokihonya mwenyecho na waja wokuhulika!