1 Timoteo 3 - Lagano da Isambi

Ngendelo vilumba walongozi na wasanghani wa didale

¹ Uno uwo ulonzi wa ihoko, munhu yahalonda ulongozi wa dale da Mulungu, kagesa sanghano inogile.

² Viyemela kilongozi wa didale yawe munhu yali bule kinghwaso, mkasano wa mwehe imwe, mwene moyo wa kulinganya, mkalagavu, yaholile, mgomela wanhu mngʼanda yake, yamanyile kuzuma;

³ yawe munhu hakolagwa ugimbi, si mtowa wanhu, bali yawe mdekedeke, si munhu wa bamila hebu mlonda mhiya.

⁴ Mwene kulongoza ngʼanda yake goya na kuzuma wanage, na hewo wamtegeleze, wawe na nhogolwa inogile.

⁵ Kilumbo munhu yahalemelwa kuilongoza ngʼanda yake, vilihi vonda yadilongoze dale da Mulungu?

⁶ Kabili sikuyawe mkristo wa sambi, kwiza yaigode, yagwile muna inhaguso ija iyataguswe Mwenembago.

⁷ Avo imgamba kusindilwa ganogile na wanhu wa kunze, giladi segeyagwe kinyala cha mizugumo, na kwingila mkitanzi cha yuja Mwenembago.

⁸ Wasanghani wa didale na hewo vivo, wawe na nhogolwa, ulonzi wawo sukuuwe wa kigeugeu, si wanhu wa kukoligwa hebu kulonda mhiya kwa nzila za kinyala.

⁹ Wawe wauteganye uja ubadagi wa inhamanilo kwa moyo ungʼalile.

¹⁰ Na hewo wano wagezigwe tanhu, kileka wekigwe Wasanghani kamba wahoneka wabule kinghwaso.

¹¹ Vivo na masano gawo woneke wene nhogolwa, si wadesi, wene moyo wa kulinganya, watamanilwa muna gamagweka gose.

¹² Wasanghani wawe wene sano dimonga, watange kuwalongoza iwana hamonga na ngʼanda zawo.

¹³ Waja wasanghane goya, wogolelwa na Mndewa nhogolwa inogile, wogangamala nghani kuipeta nhamanilo ya Yesu Kristo.

Didale dijo nguzo ja ihoko

¹⁴ Nokwandikila gano, notamanila kamba nokwiza kumwako mbwisa.

¹⁵ Ihawa kamba nokawa, gweye uvitange vigambile kugendelela muna ingʼanda ya Mulungu, dijo dale da Mulungu Yali mwene upile, iyo nguzo na nghwambaza ya ihoko.

¹⁶ Ihoko, nyongʼonyo ya nhamanilo yetu ibanza nghani, Heyo kalavilizwa chalinze mulukuli, Kapetwa mwihoko kwa mhiko za Loho, Koneka na gamalaika, Kasimulilwa muna zingholo, Katogoligwa mulumwengu, Kabokelwa uchana muli iyenzi.