1 Timoteo 2 - Lagano da Isambi

Mbuli za nhambiko, wambigalo na watwanzi wetaze

¹ Dinilonda disanghanwe kubanza magweka gose, kuko kumpula Mulungu, kumpembela, kutambikila wayagwe na kulava nhogo, kwa kilumbo cha wanhu wose,

² kabili kwa kilumbo cha watawala na wakulu wose, giladi tukale goya kwa kuituza na kumdumba Mulungu, tugambe wene nhogolwa.

³ Ago ganoga hameso ga Mulungu Muhonya wetu, kabili gomnogeza.

⁴ Kwa mzoko kolonda wanhu wose wakomboke, weze wagamanye ga ihoko.

⁵ Kilumbo Mulungu kakuko Yumwe yaiyeka, na yuja yatugondanye na Mulungu yuyo Yumwe, iyo munhu yuja Kristo Yesu.

⁶ Heyo kailava mwenyecho muhanga kwa kilumbo cha wose, na usindi wake wolavigwa kwa kikomo chake.

⁷ Na niye sanghano hiyo ya usindi ninghigwa, kamba msenga na mtumigwa, niwalangulize walilingwa inhamanilo na mbuli za ihoko; ago gonilonga gago ga ihoko, silonga utungulu.

⁸ Avo nolonda wambigalo watambike hanhu hose, wenule makono gawo gangʼalile gali bule lusango hebu kinghwaso.

⁹ Vivo na watwanzi, kuno wovala goya, waihambe nguwo za kwenela hamonga na kinyala na nzewele zinogile; vihambo vyawo sukuvigambe kukutika nghani mvili, hebu kuvala zahabu hebu lulu hebu nguwo ziguligwe na mhiya bwando.

¹⁰ Komu waihambe na sanghano zinogile, kamba watwanzi waja wabokele ikilaga cha kumvikila Mulungu.

¹¹ Mtwanzi nayaifunze magweka ga Mulungu kwa kuituza, kuno yotegeleza mbuli zose.

¹² Niye sivumila mtwanzi yalangukize wambigalo, hebu kutawala wambigalo, komu yaituze.

¹³ Kwa mzoko Adamu yuyo yasongile kuumbigwa, ilawa baho Eva.

¹⁴ Kabili Adamu hakongigwa na nyoka, bali Eva kakongigwa kumtozela Mulungu.

¹⁵ Komu mtwanzi kohona kwa kilumbo cha kulela wana, kamba wonanahila inhamanilo na mngʼazulo hamonga na moyo wa kulinganya.