Abheeburania 1 - Eriiragano Eriihya

Taatabhugya akeereenie kuhitira ku Mwaana waaye

¹ Ekare hayo, Taatabhugya akakeerenia na bhazaazi bheetu maanga maaru kwa nzira nzaru, okuhitira kubharooti.

² Nawe muziisiku zino zyo obhuteero, Taatabhugya agaambiri na neetwe kuhitira ku Mwaana waaye. Akamusora Omwaana wuyo agabhe ebhigiro bhyoosi, kweeki kuhitira kweewe Taatabhugya akateema ekyaaro.

³ Omwaana wuyo ni rumesyo rwo obhuguungo bhwa Taatabhugya, na niwe ekireengyo kye eheene kya Taatabhugya. Aragirya ebhigiro bhyoosi bhye ekyaaro bhigeenderere kubhaho kubhunagya bhwe engʼana yaaye yo obhuturo. Neewe akiiruusya kubha ekimweeso kyo okuruusya abhaatu ebhibhi, akagya mwiisaaro, akiikara orubhaara rwo obhuryo rwo Omukuru, Taatabhugya.

Yeesu ni mukuru kukira maraika

⁴ Taatabhugya akamukora Omwaana waaye abhe omukuru kukira bhamaraika, kyeego yamuheeri eriina rino ni ikuru kukira ga bhamaraika.

⁵ Ni heene, kwo okubha atariho maraika wuno Taatabhugya yamubhuuriiri amangʼana gano yabhuuriiri Yeesu, “Awe ni Mwaana waane, reero niho nibharaarikiiri kubha awe ni mwaana waane.” Na Taatabhugya ataagaambiri kwiiguru wa maraika wowoosi, “Enye ndabha Wiise waabhu, neewe arabha Omwaana waane.”

⁶ Kweeki, hano Taatabhugya yamutumiri Omwaana waaye omweene mukyaaro, akabhuga, “Bhamaraika bhoosi bha Taatabhugya bhamuseengere Omwaana wuyo.”

⁷ Na iguru wa bhamaraika akabhuga, “Enye nirakora bhamaraika bhaane bhabhe kyo obhukama, na abhabhagati bhaane bhabhe kye emireengeeri gyo omuriro.”

⁸ Nawe iguru wo Omwaana waaye akabhuga, “Awe Taatabhugya orabhaaha kirakeego na kirakeego, no obhukaangati bhwaazo bhurabha bhwe eheene.

⁹ Awe oseegiri eheene, na ohaabhiihirirwa amabhi. Kweego enye, Taatabhugya waazo, nikuhakiri amaguta go obhuzomererwa, okubha nikukore omukuru, kukira abharikyaazo bhoosi.”

¹⁰ Kweeki Taatabhugya akamubhuurira Omwaana waaye, “Awe Omukuru naawe okateema ekyaaro kubhutaangiro hayo, awe naawe okateema eriisaaro ni mirimo gya amabhoko gaazo.

¹¹ Ebhigiro bhiyo bhyoosi, bhiranyara kye eziingibho, nawe awe orabhaho kirakeego.

¹² Awe orabhikunyakunya ebhigiro bhiyo kye eziingibho, bhirakyoosibhwa kye eziikabhuuti. Nawe awe otakwiikyoosya na rumwe, naabhe emyaaka gyaazo gitana bhuteero.”

¹³ Taatabhugya ataamubhuuriiri maraika wowoosi, “Wiikare orubhaara rwaane rwo obhuryo, tee hano nikutuura abhabhisa bhaazo iyaasi wa amaguru gaazo.”

¹⁴ Kweego, bhamaraika ni kigiroki? Ni bhabhagati bha Taatabhugya, kweeki ni koro zino Taatabhugya akuzitumania, zigeende kubhahokeerya abhaatu bhano bharaatuuribhwe.