San Lucas 9 - Didza wen ta bzuaj San Lucas

Jesús gsele bene tzachhino lachhile'anke le' zajtixaje'eke rson ki yelarne'abe'a ki Diozo

¹ Jesús botobe bene tzachhino lachhile'anke le', na bde'e kie'ake balorhe kan bka'anhe lona'ake kinda yolagake notite'azi be'e malha, kan kinda yonke chen no' rhaka xhwe'e.

² Gsele le'ake zajtixaje'eke ki yelarne'abe'a ki Diozo, kan kinda yonke bene rhaka xhwe'ake.

³ Na rhe le'ake: —Bigsla bigoa'alhe ki lhaneza: Ni xaga, ni bzodi, ni ta gagolhe, ni domi, ni xhalhe yakolhe.

⁴ Gatite'azi yo'o ga' xhchhinle, leyega'an nazi kati yezate'arhele lataj na.

⁵ Na chen to yechhi ga' xhchhinle labi rhe'ankene tzo'olhe, leyerhoaj na', te lekuibi bixhte chhia nia'alhe, kinda ye'akiebekene taxhinaj xhen be'anke.

⁶ Gza'ake le'ake, na guiajke ga' diazi yechhi zingo, zajtixaje'eke rson wen le'an rheyonkate bene rhaka xhwe'ake.

Herodes labi nezene nono Jesús

⁷ Bene rne'abe Herodes benhenhe rtzalajke ki yogote'a tan rhaka; bigsla nezene bipensarhe gonhe, le'a balake rne'ake Juan beyasabebanhe,

⁸ yebalake rne'ake bela'a bene btzalaje laza Diozo grelawe Elías, te yebalake rne'ake beyasabeban to bene gde tina'ate btzalaje laza Diozo.

⁹ Te Herodes gne': —Ne'adi kuinksa gochhikane xhchogoke yikiaj Juan. ¿Nono bene ni chen, rhenda rtzalajke kie' bikaka? Tanka Herodes rhonhe balen sle'ene Jesús.

Jesús bgawe bene zengolha

¹⁰ Kati bechhinka bene lachhile'anke le' gdixaje'ekene Jesús tan be'anke. Le', beche' le'ake kieze lo yechhi rhelawe Betsaida.

¹¹ Kati gnisieke bene, gdoke le', te Jesús btzague le'ake, gdixaje'ene le'ake ki yelarne'abe'a ki Diozo, na beyonhe bene rhaka xhwe'ake.

¹² Kati chirzolho rchola, bene tzachhino gochhike Jesús: —Gochhika bene kinda tzeajke zajyesike kan zajtilhajke ta gagoke lo yechhi zingo, kan laye'alha ga'ago, le'a bigslabidia ni.

¹³ Jesús gochhie le'ake: —Legde lén ta gagoke. —Le'ake bochhike: Labidia mazirhe, gayoga yetaxhtilha le'an chopa bela napato, ze'alhote'a chen tzeajto zajeoto ta gagoka yogote'a bene ni.

¹⁴ Nakagsi kado gayo milhe bene. Na Jesús gochhie bene lachhile'anke le': Leye'ake kueke chiyon weajke.

¹⁵ Le'ake bze'anagake na gle'akike yogokate'.

¹⁶ Na gde'ala Jesús gayo yetaxhtilha le'an ye chopa bela na byoe' yeba', te be'an la'aye kan bde'e xhle'an Diozo te bxhoxhaje na bde'e kika bene lachhile'anke le' kinda kisike kika bene.

¹⁷ Ka bene gdagoke nonga belhajkene, te botobike non tzachhino ga'a tan bega'an.

Pedro gne' Jesús nake Cristo

¹⁸ To dza kati Jesús rledze Diozo toze, na bene lachhile'anke le' ze'ale'anke le', gnabene le'ake: —¿Nono rne'aka bene naka ne'adia?

¹⁹ Le'ake bochhike: —Balake rne'ake loe' Juan el Bautista, yebalake rne'ake loe' Elías, yebalake rne'ake nakalho to bene gde tina'ate btzalaje laza Diozo, na chibeyasabebanhe.

²⁰ —Te lén, ¿nono rne'alhe naka? —Gnabene le'ake. Te Pedro bochhie': —Nakalho Cristo ki Diozo.

Jesús rguixaje'e tan gatie'

²¹ Jesús gotayoe' le'ake kinda bino ye'ake kan.

²² Na gochhie le'ake: —Xhi'in bene bguio' wazakayagaze, te bizajxenke bene waka le', xanka bxozi le'an ka muestro ki xhba'a. Gotike le' te nan gaka tzona dza yeyasayebanhe.

²³ Dena'a gochhie diarhake: —Chen nolhelhe rhe'anhelhe gonle tozi le'an ne'adia, legzalalachhi kuinle, legoa'a krozo kie'alhe yogo dza te leda' le'an ne'adia.

²⁴ Le'a no' rhe'anhe gsla' yelanaban kie', wagsniti; na no' gsniti yelanaban kie' nia' kia', wagsla.

²⁵ ¿Nogagsi rhonchhin ki to bene gonhe gan doxhen lichhileyo', chen rsnitie, o rchhiaguie lagazi kuinhe?

²⁶ Na chen tolhe lén rhedoelhe ne'adia kan ki xhtidza, le'aksikan Xhi'in bene bguio' yedoene le' kati yede le'an sdote'a yelarne'abe'a ki xoze le'an kika Sando angle.

²⁷ Talite'a balale ga' ze'alhe ni bine gatilhe kati sle'erhele yelarne'abe'a ki Diozo.

Jesús betza' ka' rne

²⁸ Do xonho dza de btzalaje ten, Jesús gre'anhe lo to guia' zajledze Diozo, gche Pedro, Santiago le'an Juan.

²⁹ Latzaka rledze Diozo, btza lawe, na xhe'e bena'a xhnolhagazi kon rhe'api yesa;

³⁰ na yajse'aka chopa bene rtzalajle'anke le'. Le'ake rhe loke Moises le'an Elías,

³¹ ze'a le'an le'ake yelaye'ani ki Diozo na rtzalajke tan gati Jesús lo lichhileyo' ni, ten gaka ga' rhelawe Jerusalén.

³² Za'akalha Pedro le'an bene xhkompe chirhakagazi chigasike, gna'akaze, te ble'ekene yelaxhen ki Jesús le'an chopa bene ze'ake le'an le'.

³³ Kati beza'aka bene na, ga' ze'a Jesús, Pedro rhe le': —Muestro, ¡Tawengsi ze'arha ni! Ni gonrha tzona yo'o: To kio', yeto' ki Moisés yeto' ki Elías. Na Pedro bigsla nezene nobi rne'.

³⁴ Latzaka rtzalaje, to beaj yajse'a ga' ze'ake, te kati chidzeke lo beaj bdzebikagaze.

³⁵ Na'arhe lo beaj bye'an to chi'i bene, te gne': «Bene ni nake Xhi'inha, bene nabeaja: Legze'anaga kie'.»

³⁶ Kati benkene chi'i bene na, Jesús bega'anhe toze. Te le'ake glo'okaze ten lo laxhdoke, na tiembo tina'a bigslano gochhike tan ble'ekene.

Jesús beyonhe to bin dze'ebi be'e malha

³⁷ Kteyo, kati beyetajke lo guia', tixekagolhe guiajke te yedzagake Jesús.

³⁸ Te to bene broaje ga' dzaka bene te gne' le'an chie' zidzaj: —Muestro, be'an kle'an, byo bin kia', la tozibi zoabi kia';

³⁹ to be'e malha rzenta le'abi, na rhonta nongakuechhiya'abi le'an rhonta nonga xhcholebi kan rhonta nonga yerhoaj bchhinha lo rho'abi. Rsakaya'ata le'abi te birhe'anheta ksanta le'abi.

⁴⁰ Chigotayoa' ka bene lachhile'anke loe' kinda yebeajke be'e malha, te labi gokake.

⁴¹ Jesús bochhie': —¡Lén birheajelheye'a, le'an nakalhe malha ¿Nogakati tiembo rhe'anhe sea le'an lén kan zoe srheajeda lén? Yiajxi ni xhi'inlo.

⁴² Kati bin bguio' zeajbi ga'ago, be'e malha gro'onta le'abi lo yo'; na Jesús gdile be'e malha, beyonhe bin na te bode'ebi ki xozibi.

⁴³ Na yogoke gokiekene banachhi ta xhen rhon Diozo. Tzalaka bene rhe'akiekene banachhi tan rhon Jesús, le' gochhie bene lachhile'anke le':

Jesús rguixaje'e ta grope niaa ki yelagoti kie'

⁴⁴ —Legze'anaga chhia'a ten te bigalalachhilhe: Xhi'in bene bguio' yodeke le' lona'a ka bene.

⁴⁵ Na le'ake birheajniekene tan rhe le'ake, labine ryalhaj yikiajloke kinda tzeajniekene; le'aksikan rdzebike snabekene Jesús kinda kixaje'e.

¿Nono za'akarhe?

⁴⁶ Na'arhe ka bene lachhile'anke le' gzolhoke rhebeajniake kinda sniziekene nonolha de le'ake gakake bene za'akarhe.

⁴⁷ Jesús, gokiebene ka rhonke kuenda, na bledze to bindo na bze'ebi kuite

⁴⁸ na rhe le'ake: —No' rzi'i bindo ni, rzi'i ne'adia, na no' rzi'i ne'adia; le'aksikan rzi'i no' gsela ne'adia. Tanka, bene mazirhe nexaj de lén, le' nake bene mazirhe yajlo.

No' rhon tozi rho'o, ze'a le'an rho'o

⁴⁹ Juan gochhie le': —Muestro, ble'eto to bene rholague be'e malha rle'e loe', gonheto gzagato, le'a tan binake tozi le'an rho'o.

⁵⁰ Jesús bochhie': —Labigzagalhe, le'a no' rhon tozi rho'o, ze'a le'an rho'o.

Jesús gdile Santiago le'an Juan

⁵¹ Kati chiza'a ga'ago tiembo kati Jesús yebe'anhe yeba', guiaje dolachhie yechhi rhelawe Jerusalén.

⁵² Gsele gnerho bene noake rson, te guiajke lo to yechhi zingo ki Samaria, kinda kilhajke ga' yega'anhe;

⁵³ te ka bene Samaria bigo'onkene tzoe' yechhi, le'a tan gokiebekene zeaje Jerusalén.

⁵⁴ Kati bene lachhile'anke le' Santiago le'an Juan ble'ekene ten, gochhike le': —Jesús, ¿arhe'anlo gonto nonga yexaj gui'i lo yeba' kinda gsniti le'ake?

⁵⁵ Na Jesús beyekiaje te gdile le'ake.

⁵⁶ Dena'a beyiajke yeto' yechhi zingo.

Kinda gorha Jesús

⁵⁷ Kati zeajke lo lhaneza, to bene rhe Jesús: —Jesús, rhe'anda sale'anha loe' gate'azi tzeajlho.

⁵⁸ Jesús bochhie': —Beza' napakaba xhan beloaj, te bea zoa xilhakaba napakaba lichhikaba; te Xhi'in bene bguio' labi nape ga' gasie.

⁵⁹ Jesús gochhie yeto' bene: —Da le'an ne'adia. Na le' bochhie': —Jesús, be'ana lataj zalho dzajkachia xoza.

⁶⁰ Jesús rhe le': —Bdelataj ka bene goti skachike bene goti kie'ake; loe' guiaj te yajtixaje'e yelarne'abe'a ki Diozo.

⁶¹ Yetoe' gochhie Jesús: —Jesús, rhe'anda sa'a le'anha loe', be'ana lataj zalho zajechhika kan bene lo yo'o kia'.

⁶² Jesús gochhie le': —No' rzen rhado te laryoze xhkodzala, labi gonhe chhin lo yelarne'abe'a ki Diozo.