San Lucas 24 - Didza wen ta bzuaj San Lucas

Jesús chibeyasabebanhe

¹ Dza nerho ki xhman, guiajkake bayengolha, lo ye'arhoba, na noake nisa rlaa zixi tan be'anke.

² Nan bchhinke, ble'ekene guiaj nabaga rhoa ye'arhoba labirhe xhoa ka' gxoake;

³ na guio'oke, te bible'ekene kuerpo ki Jesús.

⁴ Labi nezekene bigonke pensarhe ki ten, kati kazoazi ble'ekene chopa bene dzake kuitake, nakoke xhake rhe'api yesa.

⁵ Bdzebikagaze, te bze'acho kuinke loyote'a; te ka bene na gochhike le'ake: —¿Nobixhkia' rheguilhajlhe lén ladaj bene goti bene nabanhe?

⁶ Labi yoe' ni, chibeyasabebanhe. Ledzajne tan gochhie lén kati ne zue' lo yechhi Galilea:

⁷ Xhi'in bene bguio' rheyala yodeke le' lona'a ka bene dolaxhkia', te gotike le' lo yaga krozo te nan gaka tzona dza yeyasayebanhe.

⁸ Na'arhe ka nigolha ni yajnekenhe didza ki Jesús,

⁹ te nan bechhinke tan guiajke lo ye'arhoba, gdixaje'eke yogote'a ten bene chineaj glachhile'anke Jesús, kan bene yebalake.

¹⁰ Ka nigolha yajoake rson kika bene glachhile'anke Jesús, rheloke María Magdalena, Juana, María xhna Santiago, le'an yebalaka nigolha.

¹¹ Bene glachhile'anke Jesús gokiekene rzi'ika ye'a nigolha ni, na labi guiajkenhe ye'a.

¹² Za'akalha kan, Pedro guiaje rze'aze lo ye'arhoba; kati byoe' loelhe, toga sabno blachhike Jesús ble'ene. Na'arhe beyiaje lo yo'o kie', rhe'akiene banachhi tan goka.

Neza zeaj lo yechhi Emaús

¹³ Lagazi dza na, chopa bene glachhile'anke Jesús, zeajke lo to yechhi rhelawe Emaús, naka kado' chineaj milhe niaa kinda xhchhinrha Jerusalén.

¹⁴ Zeajke rtzalajke ki yogote'a tan goka.

¹⁵ Tzalaka rtzalajke kan rhebeajniake, Jesús yajxhenhe le'ake te gzolhoe zeaje le'an le'ake.

¹⁶ Te za'akalha rle'ekene le', zoa ta labi bde'e lataj yeyonbe'ake le'.

¹⁷ Jesús gnabene le'ake: —¿Nobi kie' zeajlhe rtzalajle lén toneza? Gzoke na rhonye'achike,

¹⁸ na to bene rhelawe Cleofás, bochhie': —¿Tozilho loe' chibega'anlo lo yechhi Jerusalén te binezelho, tan choka lo dza na?

¹⁹ Le' gnabene le'ake: —¿Nobi chigoka? Gochhike le': —Ka' goka ki Jesús bene yechhi Nazaret, goke to bene xhen btzalaje laza Diozo ka' rhonhe le'an ka' rne' lo Diozo le'an sdo xhen lo yechhi;

²⁰ te xanka bxozi le'an kostisia kne'ato bode'eke le' kinda gzoake le' rhoa yelagoti lo yaga krozo.

²¹ Ne'ato gopato yelarbezalachhi le' gsle'e yechhi ki Israel. Chizeaj tzona dza goka yogote'a ten.

²² Za'akalha balaka nigolha rhonke tozi ne'ato chibtzebike ne'ato, guiajke bayento' lo ye'arhoba,

²³ na tan labi beyalekene kuerpo kie', belha'ake lo yo'o. Te rguixaje'eke balaka angle yajtzagake le'ake na' chigochhike le'ake Jesús nabanhe.

²⁴ Balaka bene xhkompato guiajke lo ye'arhoba na beyalekene konka' gochhika nigolha le'ake, te labi ble'ekene Jesús.

²⁵ Na'arhe Jesús gochhie le'ake: —¡Bixhkia' birheajnieguelhe lén, kan kani rheajelhe ye'a yogote'a tan gne'aka bene btzalajke laza Diozo!

²⁶ ¿Alaga' birheyala sakaya'a Xhi'in Diozo zia'alha kati zigakalhe' xhen?

²⁷ Dena'a gzolhoe rzeajniene le'ake yogote'a ka' rtzalaj kie' lo xhtidza Diozo, ta gzolhote'a lo guichi ki Moisés na zeajte'a kan yogote'a guichi ki bene btzalajke laza Diozo.

²⁸ Nan bchhinke lo yechhi ga' zeajke, Jesús be'anhe kata tzeaje gnerho.

²⁹ Te le'ake gotayoke le' kinda yega'anhe, na gne'ake: —Bega'an le'an ne'ato, le'a chirhon chigola, chizeaj rchola. Jesús guioe', kinda yega'anhe le'an le'ake.

³⁰ Kati chirhe'eke gagoke yeta, le' gde'ale yetaxhtilha, na bde'e xhlhe'an Diozo, bxhoxhaje na bde'e kie'ake.

³¹ Tina'azi beyalhaj yajloke te beyonbe'ake Jesús; te le' tobenitize.

³² Na gochhike leza'ake: —¿Alaga' tabalha laxhdorha gla' lo lechorha kati zeze'e rtzalaje toneza na rse'adiene rho'o xhtidza Diozo?

³³ Labirhe glezake mazirhe, beyasake na beyiajke Jerusalén, ga' beyalekene nadobika bene chineaj glachhike le'an Jesús le'an ka bene xhkompake,

³⁴ Gochhike le'ake: —Tabalhaksi chibeyasabeban Jesús, na chiyajtzague Simón.

³⁵ Na'arhe rhopake gdixaje'eke ka' goka kie'ake lo lhaneza, na nonaka beyonbe'ake Jesús kati bxhoxhaje yetaxhtilha.

Jesús yajtzague bene glachhile'anke le'

³⁶ Nedzake rtzalajke ka' goka, kati Jesús yajsoe' galawe ga' dzake, te bledze le'ake na gne': —Tachhia'a ta tzawe ki Diozo zoa le'an lén.

³⁷ Le'ake bdzebikagaze, rhonke kuenda rle'ekene to be'egrasia.

³⁸ Te Jesús gochhie le'ake: —¿Nobixhkia' rdzebigalhe? ¿Nobixhkia' rbixhaje laxhdolhe?

³⁹ Leguiokalhe na'a kan nia'a. Ne'adiksa. Lekan ne'adia na leguio: To be'egrasia labi napa be'alha kan chhita, ka' rle'elhe lén napa ne'adia.

⁴⁰ Nan gochhie le'ake kan, bsloene le'ake ne'e kan nie'e.

⁴¹ Le'ake labi rheyochhi tzeajkene ye'a, tandozi rhebekene le'an rhe'akiekene banachhi, Jesús gnabene le'ake: —¿A napalhe ni bi ta gagorha?

⁴² Bdeke troa'a bela ye'axo,

⁴³ na le' gxhie'e na gdawe ga' dzake.

⁴⁴ Dena'a gochhie le'ake: —Tan goka kia' naka tan gdixaje'eda lén kati nezoale'anha lén: rheyala gaka kumplirhe yogote'a tan zoa kia' lo xhba'a ki Moisés, lo guichi ki bene btzalajke laza Diozo kan lo salmos.

⁴⁵ Na'arhe be'anhe nonga tzeajniekene xhtidza Diozo,

⁴⁶ na gochhie le'ake: —Kan zoa, Xhi'in Diozo rheyala gatie', te yeyasayebanhe nan gaka tzona dza,

⁴⁷ te nan gla'ake lawe, kixaje'eke yogote'a lo yechhi xhen, kinda yeyakake ki Diozo, kinda le' yezixhenhe dolaxhkia' kie'ake. Ta solhote'a lo yechhi Jerusalén,

⁴⁸ lén rheyala kixaje'elhe ki tan chible'elhe.

⁴⁹ Na ne'adia sela kie'alhe tan bkie'abi Xoza. Te lén leyega'an nizi, lo yechhi Jerusalén, kati si'irhelhe balorhe tan za'a yeba'.

Jesús rhebe'anhe yeba'

⁵⁰ Dena'a Jesús gche le'ake tzala'alha lo yechhi Jerusalén, Betania te'a, na gchise ne'e te be'an la'aye le'ake.

⁵¹ Na tzalaka rhon la'aye le'ake, gbigue ga' dzake na bebe'anhe yeba'.

⁵² Le'ake, de be'anke le' xhen, beyiajke Jerusalén rhebekeguezene.

⁵³ Te tolizi ze'ake lo yo'o sdo'o, rhonke xhen Diozo.