San Lucas 2 - Didza wen ta bzuaj San Lucas

Golhaj Jesús

¹ Lo tiembo tina'a, bene rne'abe Cesar Augusto gne' xhchisake to guichi soa loka bene ki sdo xhen lichhileyo'.

² Guichi nerho ni ga' zoa loke be'anke kati Quirinio goke gobiarne ki Siria.

³ Yogoke go'onhe tzeajke dzajzoa loke lo yechhi kie'akagse.

⁴ Tanka, José broaje lo yechhi ki Nazaret, ga' nababa Galilea, te beyiaje Belén, ga' nababa Judea, ga' golhaj bene rne'abe grelawe David, le'a José goka xozixhtoe David.

⁵ Guiaje na' yajzoa lawe, tzaxhen le'an María, nigolha kie', noe' bindo.

⁶ Na tzalaka dzake Belén, bchhin ki María tiembo tan soa xhi'inhe.

⁷ Te na' golhaj xhi'inhe nerho, na bolachhiebi lo beka' te gdixajebi ga' rhagoka beaguixi, le'a tan bigoka ga' yega'anke.

Ka angle le'an ka bene ryoke beaguixi

⁸ Ga'agozi Belén bkoaka balaka bene rhega'anke chigolala loguixi ryoke bekoxhilha kie'ake.

⁹ Kazoazi yajse'a to angle ki Diozo, te yelaye'ani ki Xosrha Diozo, bze'ani torhoe' ga' ze'ake; te bdzebikagaze.

¹⁰ Te angle na rhe le'ake: «Labi sdzebilhe, le'a noa kie'alhe to rson wen, tayebelhe yogolhe:

¹¹ Nan golhaj kie'alhe lo yechhi ki David to nogsla rho'o, le' nake bene za'a yeba' te nake Xhi'in Diozo.

¹² Kinda ye'akiebelhe, yalelhe lén bindo na narhelebi beka' te diabi ga' rhagoka beaguixi.»

¹³ Tina'ateka yajse'aka, kuita angle, tixekarhe angle zake yeba', rhonke xhen Diozo te rne'ake:

¹⁴ «¡Rhonrha xhen Diozo chhie'e yeba'! ¡Chhia'agazi lo lichhileyo' naka ki bene rzi'ike banheza ki Diozo!»

¹⁵ Kati ka angle beyiajke yeba', bene ryoke beaguixi gzolhoke rhe'ake leza'ake: —Dialhe yiajrha Belén, dzajyorha tan goka le'an tan Xosrha Diozo chigdixaje'ene rho'o.

¹⁶ Guiajke porharhe te beyalekene María le'an José, te bindo na diabi lo ga' rhagoka beaguixi.

¹⁷ Kati ble'ekenebi, gzolhoke rguixaje'eke ka' gochhi angle le'ake ki bindo na,

¹⁸ te yogote'a bene benkene rhe'akiekene banachhi tan rtzalajka bene ryoke beaguixi.

¹⁹ María nago'oze diarha ten lo laxhdawe, le'an zoate'aze kuenda.

²⁰ Ka bene ryoke beaguixi, beyiajke rhonke xhen Diozo le'an rholake ki Diozo ki diarha tan ble'ekene kan benkene, yogote'a ten goka ka' gochhika angle le'ake.

Bindo Jesús yajuakebi lo yo'o sdo'o

²¹ Goka xonho dza, beakebi te gde'alake guidi nako gabachi'i kie'abi na bsike lobi Jesús ka' lobi gochhi angle María kati zigoalhebi.

²² Kati bchhin dza, tan rhala yonke chhia'a kuinke ka' rne'a xhba'a ki Moisés, gche'ake bindo na Jerusalén kinda gdechhikebi lo Xosrha Diozo.

²³ Be'anke kan le'a lo xhba'a ki Xosrha Diozo zoa kan: «Yogote'a bin bguio' rzoakabi nerho rdechhikebi lo Xosrha Diozo.»

²⁴ Guiajke yajoake balan ka' rne'a xhba'a ki Xosrha Diozo: To koe boto' gbeo.

²⁵ Tiembo tina'a gzoa Jerusalén to bene grelawe Simeón. Goke to bene weze'anaga le'an bene wen, te rbeze yaka chhia'a Israel. Na Be'egrasia ki Diozo gze'a le'an Simeón,

²⁶ na bsnisie le' labine gatie' kati sle'erhene Jesús, bene sela Xosrha Diozo.

²⁷ Na Be'egrasia ki Diozo, gche'a Simeón lo yo'o sdo'o; te kati xozi xhna bindo Jesús le'aksikan gche'akebi, kinda gonke ka' rne'a xhba'a,

²⁸ Simeón bnidebi na be'anhe xhen Diozo na gne':

²⁹ «Nan, Diozo, ka' gne'alho choka kumplirhe: bdelataj ki bene rhonhe kio' gatie' chhia'a.

³⁰ Le'a chible'eda yelawela

³¹ tan chigzolholo gonlo lo yogote'a yechhi,

³² gui' na gze'ani ka yechhi yela te gaka xhen yechhi kio' Israel.»

³³ Xozi xhna Jesús gokiekene banachhi kati benkene ka' rne'a Simeón ki bindo na.

³⁴ Na'arhe Simeón be'an la'aye le'ake, te rhe María, xhna Jesús: —Byokalho, bindo ni chide'ebi gonbi nonga tixeka bene yechhi xhen ki Israel sbixike o yeyasake. Le'abi kixaje'ebi ta chhia'a ki Diozo te tixeke biye'ankene,

³⁵ kinda snisielhe tan rhonle kuenda. Na diarha ten gaka kio' ka' to kchiyo te lo laxhdolho.

³⁶ Le'aksikan ze'a na' to nigolha btzalaje laza Diozo rhelawe Ana, xhi'in Penuel, koe ki Aser. Chirhonhe golha, btzagane' kati nerhonte xhkuidi, te gzoe' le'an bene kie' gachhi yiza;

³⁷ chizeaj tapa galaj tapa yiza tan bega'anhe weze'abi. Bigslabata roaje lo yo'o sdo'o, tan rhonhe ki Xosrha Diozo do dza do ye'alha, rchiajene ta gawe le'an rledze Diozo.

³⁸ Ana bchhinhe'e tina'ateka, te gzolhoe rde'e xhle'an Diozo kan rtzalaje ki bindo Jesús ki yogote'a no' rbezaka yeyaka Jerusalén.

Zeyiajke Nazaret

³⁹ De goka kumplirhe diarha tan rne'a lo xhba'a ki Xosrha Diozo, beyiajke Galilea, yechhi kie'akagse Nazaret.

⁴⁰ Bindo na rhe'anibi te rhakate'azibi mazirhe fuerti, napagazibi yelarheajnie le'an rzi'ibi tachhia'a ki Diozo.

Bindo Jesús beyalekenebi lo yo'o sdo'o

⁴¹ Xozi xhna Jesús rheajke yogo yiza Jerusalén lo lani ki Paskua.

⁴² Te kan, kati Jesús gokiene tzachhino yiza, guiajke na' yogoke, ka' nolanke lo lani na.

⁴³ Kati beyochhi lani, kati zeyiajke lo yo'o kie'ake. Bindo Jesús bega'anbi Jerusalén le'an bigsla gnisie xozi xhnabi.

⁴⁴ Rhe'akiekene Jesús zeyiajbi notzebi bene, be'anke to dza neza; te kati rheguilhajkebi ki dia'adza kie'ake le'an ki bene nonbe'ake,

⁴⁵ bigsla bedzelhekenebi. Te beyiajkake Jerusalén kinda yeguilhajkebi.

⁴⁶ Gokarhe tzona dza bedzelhekenebi lo yo'o sdo'o, rhe'ebi le'an ka muestro ki xhba'a, rze'anagabi kan rnabebi le'ake.

⁴⁷ Te yogote'a no' rhenke rhe'akiekene banachhi tan rheajniebi le'an ka' rhochhibi.

⁴⁸ Kati xozi xhnabi ble'ekene le'abi, gokiekene banachhi; na xhnabi gochhie le'abi: —Bindo kia', ¿nobixhkia' be'angalo kan kne'ato? Xoslo le'an ne'adia chibeguilhajto loe' bebanguezeto.

⁴⁹ Jesús bochhie': —¿Nobixhkia' rheguilhajalhe ne'adia? ¿Abinezelhe tan rhe'anhe se'a lo yo'o ki Xoza?

⁵⁰ Te biguiajniekene tan rhe'abi le'ake.

⁵¹ Te beyiajbi le'an le'ake Nazaret, ga' gzoabi, rze'anagagazibi yogote'a. Xhnabi nago'oze diarha ten lo laxhdawe.

⁵² Te Jesús rhe'anite'azi yelarheajnie kie' le'an yelatona, te rhebebi tan ze'a Diozo le'an le'abi le'an ka bene.