Yook 142 - Yomgkom

Maskil ye yook Dewidbed botdem aom bikne doboroon kumbed wongkoon. Kurikuri yook.

¹ Yariman yaa naawon baandaan, Yariman yaa mimyob keewe awawe ande kankone baandaan.

² Ne mungkubmangkab kuu kanmene ye yaa konaan, ne dabab kuu daanaan kui.

³ Ne niindem aom kuu wuudne yiminban keraan kuu, ne kiwaan korem kuu ebkaadmo. Ne yarimain ye kiwaan ari kuu karub yenambed kawaad nong awinewande kowiwen.

⁴ Ne wiwi angka wedme. Karub mim maa ne dowad ma meenewindo. Ne nen kukbimaan ye karub maayiibban dowan, ne wadkeri dowad kangkadmi ye karub maayiibban dowan.

⁵ O Yariman, eb yaa baandaan. “Eb kuu ne kukbimaabbon, wad doruubdan kiri kee eb kuu ne yaa bangkawimaab ye karub.” andaan.

⁶ Ne kuu nen kubuniiwa yirimo keraan kowe, ne baandi yaa wengambere inanduwe. Ne nenbande kamiibdan kuu aromkono darewoowiib ne arebban kowe, yi yaambed ne nen burudande angka kowe.

⁷ Ne kuu wii aombed doberemoon areb keraan kuyaambed nen angka kowe. Kwanebko ewaningko yaa eso anda. Ebbed ne yaa amun amun kamaneeb kowe, yorokmodan kuu neyiib yaa menebe nedbaniib.