Yook 130 - Yomgkom

Daane kawini ye yook.

¹ O Yariman, ne miin yiminban keraan ye niindem aombed eb yaa baandaan.

² O Yariman, ne weng kee wengamberewe. Eb kerendem kuu ne yaa kowe ne yaa mimyob keewe ande baandaan kuyaa wengambere.

³ O Yariman, eb kuu kekamune ambarakmi ye yuun awinaneeb keraneen kuu, o Yariman, kanembed ma wad doraanban keraneen kii.

⁴ Kumban eb kuu ambarakmi are nonondandi kerekmeniib kowe, eb yaa unanuub kumbedmo yimin.

⁵ Ne kuu Yariman ye awawi dowad meedmiin, ne inamen kumundiniib kumbed meedmiin kii, kwane ye weng yaambed kwananeen ande kowaan.

⁶ Ne inamen kumundiniib kumbed Yariman ye awawi dowad nindorokiibbed meedmiin, amnoom oone kerekbiridanbed awawini waruk ande meedmimaib arebban, anamaa, amnoom oone kerekbiridanbed awawini waruk ande meedmimaib arebban.

⁷ O Israeldan, Yarimanbed kwananeen ande meedmime, amborom kuu Yariman kuu womoniyiibban ye mimyob dowakeniib kowe, kwane ye kuu yiminmo biddi ye karub.

⁸ Yekareb yembed Israeldan kuu yi ambarakmi yaambed bidde baneen.