Yook 129 - Yomgkom

Daane kawini ye yook.

¹ Israeldan kuu kekane yedmime, “Ne kewed yaambed mene kibikee yimbed dabab yemoon bangkawiwen.” andime.

² Kedi, kekane yedmime, “Ne kewed yaambed mene kibikee yimbed dabab yemoon bangkawiwen, kumban yi kuu ne yaa ma nangme burudande dorindo.

³ Yimbed ne angkurom yaa kuu nong yikyikiibbed wangkanabiwen kumbed koodem areb kuburu doboob yemooniib keraan.

⁴ Kumban Yariman kuu yorokmo, kedi, yembed kuye arewa kamenabidanbed ne nen yerengkiwen ye nong kuu nare burudande obon kawoon.” andime.

⁵ Kaneya yi kuu Saiyon yaa arud wandembirimaib kuu, yi korem yaa karak kondene yenbandoko ikakman winime.

⁶ Kwane yi kuu kereek ambib animari dembekore kirodmo nuubnoon kainindo areb kerime.

⁷ Yi kuu wande bi ye karubbed kuyaa yob ma wedmindo kuye kereek areb kerime, kwane yi kuu wiit yob andedmi ye karubbed kuyaambed ma andedmindo kuye kereek areb kerime.

⁸ Yi yaa dewenebe burudandandamiibdan kuu kekane yedmaib, “Yariman ye amun kerundi kuu yiib ari kowok, kwane Yariman yaningko yaambed yiib yaa amun kerunduub kii.” andaib.