Yook 122 - Yomgkom

Daane kawini ye yook Dewidbed wongkoon.

¹ “Yariman yambib yaa wenem.” anduwiwen kuu ne kuu kubi darewoob keraan.

² O Yerusalem, kibireb kee nub kuu kub kuuk ambongko aom doruub.

³ Yerusalem siti yenbiwen kuu kande kobkokmo kande daboknenib yenbiwen.

⁴ Israeldan yi amyenimbon korem kuu kumaom daane winimaib, Yariman ye amyenimbon kui. Yi kuu Yariman yaa eso andande daane winimaib, Israeldan yi dowad amob weng ongmoon yaambed.

⁵ Kedi, kwarimbed dibere wengyundimbon kuu dangoon, Dewid ye awoya arimbed dibere oonimbon kui.

⁶ Yerusalem aom iwari yewenubmo keri dowad kurikuri kerime, kekane yedmime, “Kane kane kub yaa mimyob dowaken kowimaib yaa kuu yiminmo kerundok.

⁷ Kub siti kuuk aom kuu iwari yewenuwiib kerok. Kub korok korok yi ambibbon aom kuu yiminmo dobiriyiib kerundok.” andime.

⁸ Ne karubkimiib nangkodmiayiib yi dowadbed kwane dakmaniin, “Kub aom kuu iwari yewenubmo kerok.” andaniin.

⁹ Yariman nub God ye ambib ye dowadbed ne kuu kub yiminmo dobere andi kiwaan onmaniin.